Awe mainta den comision di Husticia nos a trata e protocol “versterking grenstoezicht”. Un protocol extenso cu lo tin como resultado fortificacion di e trabounan na nos fronteranan entre e departamentonan local y Hulanda. For di 2005 Aruba ta trahando hunto cu Hulanda pa loke ta controlnan na nos frontera.
CONTENIDO DI PROTOCOL
E protocol cu lo bay firma ta amplia extensamente riba e tareanan di cada departamento y pais, e responsabilidadnan di cada departamento y pais, e comision di evaluacion, y tambe con ta anda na momento cu tin un disputa. Den e protocol, cu lo wordo firma pa Aruba y Hulanda, ta ancra cu Aruba ta keda responsabel pa e maneho y tur trabou ta wordo ehecuta bou liderazgo di e departamentonan local.
BALOR AGREGA
Cu e protocol aki e trabounan cu ta wordo ehecuta na nos fronteranan door di diferente departamentonan local lo bira mas eficiente y eficaz. Hulanda ta pone tambe un suma significante disponibel pa ehecucion y tambe “opleidingen” pa e personal. Di e forma aki nos por combati criminalidad na nos frontera manera traficacion di arma, droga y hende mas eficaz. Pero tambe e comparticion di informacion lo conoce mehoransa y esaki, manera ta ancra den e protocol, conforme e leynan vigente na Aruba.
PA CONCLUI
Ta importante pa menciona cu Guarda Nos Costa, como organisacion tambe ta wordo menciona den e protocol. Ta di spera cu pronto e “rechtspositie” pa e personal di Guarda Nos Costa por wordo regla, pa asina nan tambe por cuminsa aporta pa amplia e seguridad na nos frontera.