Negosacionnan entre Aruba y Hulanda ta continua pa loke ta trata e condicionnan pa Aruba bin na remarca pa haya prestamo pa cubri gastonan di Gobierno. Aña pasa, debi na e pandemia di Covid, Gobierno a perde 40% di entrada y no ta den posicion pa cubri e gastonan su so. Por lo tanto, Gobiero mester a busca ayudo, asina Prome Minister Evelyn Wever-Croes a informa.
Unico ayudo cu Aruba a haya ta di Hulanda. E ayudo aki a bin mara na condicionnan. Gobierno di Aruba a negocia hopi luna pa asina suavisa e condicionnan cu Hulanda a impone. Esaki ta e motibo tambe cu Gobierno no a firma di biaha na momento cu Hulanda a presenta e condicionnan y a tuma tur tempo pa negocia y suavisa e condicionnan apesar cu entre otro sindicato di Polis y algun gremio comercial a pidi Gobierno pa firma di biaha.
Dia 13 di november 2020, Gobierno di Aruba y Hulanda a yega na un acuerdo. E condicionnan pa loke ta trata e Landspakket ta conoci y a wordo publica. Desde 13 di november pa 1 di februari a wordo negocia riba e ‘timeline’ di ehucion di e diferente condicionnan cu a conduci den un “Uitvoerings Agenda”, un Agenda di Ehecucion cu a wordo firma dialuna.
Siman pasa diabierna Prome Minister a elabora ampliamente riba e Agenda di Ehecucion den un cumbre cu sindicatonan di sector publico, sector semi-publico y sector priva y mediador di Gobierno y tambe den conferencia di prensa dialuna 1 di februari.
Diamars 2 di februari Gobierno a ricibi e Agenda di Ehecucion y a manda esaki pa Parlamento y wordo publica pa henter Aruba por mira cua ta e condicionnan.
Prome Minister a indica cu e pakete ta uno bastante elabora na unda cu constantemente un ekipo grandi ta traha riba dje. E enfasis riba tur e areanan ta pa den e siguiente lunanan investiga y haci estudio y doorlichting. Ta trata temanan di finansas, economia, impuesto, gastonan di sector publico, especialmente salario di trahadonan publico, reformanan di economia, labor, cuido di salud, enseñansa y husticia. Por conclui cu e ensfasis ta pa investiga con e ta na Aruba y compara cu Corsou y Sint Martin y a base di e conclucionnan lo haci cambionan unda cu ta necesario.
E concentracion pa e dianan nos dilanti ta riba e estudionan cu ta wordo haci. Ainda no tin ningun decision riba mesa. Y den e cuadro aki, Prome Minister a indica na tur sindicato cu nan lo wordo involvi ora ta toca nan area prome cu desicionnan wordo tuma.
Parlamento a pidi Gobierno pa splica tur loke ta trata e Landspakket y e Agenda di Ehecucion. Diaranson atardi pa 3or, e splicacion aki ta tuma luga via un reunion publico den Parlamento. Tur minister lo splica kico ta toca nan Ministerio den e Agenda di Ehecucion Gobierno ta invita pueblo di Aruba pa sigui e reunion aki pa sa kico e Landspakket y e Agenda di Ehecucion ta encera.