Home Intimacy Tips pa un mihor bida sexual den 2021

Tips pa un mihor bida sexual den 2021

SHARE

 

Na unda cu bo por ta den bida, y pa con experto bo ta kere cu bo ta, semper tin algo mas pa siña. 

Siguientemente, algun tips of recordatorio, pa un mihor bida sexual.

Espacio fisico y mental

Busca un espacio na unda bo por experiencia placer sin preocupacion. Pa mayoria hende, esaki kiermen un caminda cu bo por ta comfortabel y safe y na unda bo por comunica vocalmente bo deseo- y necesidadnan. Wak pa trese variacion den esaki. E cama no ta e unico lugar na mundo unda bo por haci sex. Uza bo imaginacion. Si e lugar ideal aki pabo ta un caminda den aire liber, bo ta un fanatico di aventura y bo ta zorg pa bo ta safe, dal bai numa. Zorg pa bo celular ta paga, purba laga e stress di debernan diario un banda un rato, y si bo nota cualkier distraccion den bo mente, lage los y concentra ariba e momento, bo curpa y e persona cu ta cubo.

Curiosidad

E miho componente pa bon sex ta curiosidad. Hunga cu otro, mishi, caricia, pone atencion e detayenan unico di e curpa di bo pareha. Pone atencion na su reaccionnan, na unda e ta sinti bon. No preocupa tanto pa locual bo lo mester hasi siguientemente, bo no ta actuando den un pelicula. Keda presenta na e momento actual y disfruta di cada paso. Laga e movecionnan y accionnan desaroya nan mes un manera natural y espontaneo. 

Innovacion

Purba posicionnan acrobatico nobo ta un opcion, pero solamente pa esnan cu tin e condicion y forsa fisico pa haci esaki. Si bo sa cu bo no tin e forsa pa hisa bo pareha of pa wanta un posicion pa un momento prolonga, evita accidentenan innecesario. Importante no ta pa impresiona bo pareha sino pa find out kiko ta e angulo ideal pa stimulacion y contacto intimo corporal cu ta produci e sensacion cu boso ta desea. Introduci lingerie, kostuum y sextoys den bo repertorio si bo nunca a haci esaki of a laga esaki un banda cu paso di tempo. 

Horario

No reserva sex solamente pa anochi, net prome cu bo bai drumi. Esaki no ta un critica, ta comprendibel cu esaki ta algo conviniente pa mayoria hende. Pero esaki hustamente ta e momento di dia cu bo ta mas cansa. Door di haci esaki un custumber, hopi bes sex ta wordo posponi door di cansancio, of e ta bira algo rutinario y monotono cu bo ta haci sin gana y cu e meta pa keda cla lihe pa bo por bai drumi. Purba varia e ora cu bo ta haci sex. Mainta, ora bo tin mas energia, of durante lunchbreak tambe ta opcionnan valido y kisas hopi mas espontaneo.

Meta

Evita di focus pa yega na un orgasmo. Aunke pa mayoria hende un orgasmo ta e consecuencia di e acto sexual, e no mester ta e meta principal pa cual bo ta haci sex. Asina cu e orgasmo bira e unico meta bo lo bai concentra ariba logro di e meta aki. Y ora no logra, bo lo sinti cu bo a faya. Pa hopi hende, principalmente e hende muher, e stress cu ta wordo ocasiona door di e presion pa yega na un orgasmo ta hustamente locual ta preveni cu e orgasmo ta tuma lugar, locual na su bes ta pone cu nan ta bai ‘fake’ un orgasmo djis pa no mustra ‘laf’ of ‘friu’ of pa complace e pareha. ‘Fake’ un orgasmo ta nifica: Gaña bo mes. Duna espacio pa e tension subi naturalmente door di laga los y disfruta di e momento. 

E hecho cu e homber haya su orgasmo no automaticamente mester nifica e final di e acto sexual. Bo no ta trahando un pelicula pornografico na unda e unico meta ta e satisfaccion di e homber. Tin diferente manera pa yega na un orgasmo. Experimenta y find out kiko ta traha pabo. Si sextoys ta yuda cu e stimulacion cu abo mester, introduci esakinan den bo repertorio. Un sextoy no ta un competencia pa bo pareha sino algo cu ta complementa boso bida sexual. 

Sea creativo, disfruta, pero no obsesiona. 

Lubricacion

Esnan mas jong hopi biaha ta pensa cu uzo di lubricante ta algo pa hendenan ‘mas bieuw’. Pero mas lubricante nunca a mata ningun hende y por yuda pa mehora tanto e experiencia como e sensacion. Sea cu bo ta uzando un sextoy of bo ta den accion cu bo pareha, lubricantenan ta trese variacion. Tin den diferente sabor, textura y sensacion. Esunnan cu ta bira cayente of friu of esunnan cu ta yuda prolonga of stimula, entre otro.

Explora bo mes

Masturbacion ta un momento intimo pa experiencia bo propio placer y explora opcionnan nobo. Si bo ta den un relacion, automaticamente bo lo sinti cu sex ta mara na bo pareha, pero sin un pareha tambe bo tin bo sexualidad. Inverti tempo pa explora esaki na bo mesun manera den priva y eventualmente hinke den e repertorio di pareha. Tur locual bo siña di bo mes bo por comunica cu bo pareha pa un mihor satisfaccion sexual.

Comunicacion

Con intimo bo ta cu bo pareha, ta determina con vocal bo ta tribi di ta pa locual ta trata bo deseonan, pero tambe pa locual ta trata e cosnan cu bo no ta gusta. Siña bisa ‘no’ ora cu ta trata di algo cu ta causabo dolor of humiyacion. Sex no mester ta un obligacion ni un castigo. Bisa ‘si’ pasobra bo ta sintibo intimida, menaza of emocionalmente manipula, no ta un systema sano, sino mas bien un sistema toxico di hiba un relacion. Tur cos tin su extremo. Bisa ‘no’ automaticamente na cualkier idea nobo cu bo pareha proponebo pa innova y mehora boso bida sexual, ta funesto pa bo relacion, y na un of otro momento bo lo bai hayabo ta enfrenta e consecuencianan. Pero di otro banda, e hecho di ta habri pa experiencianan nobo no ta nifica tampoco, cu bo mester bai di acuerdo cu tur practica sexual cu ta existi rond di mundo. Importante ta pa yega na un balance di ‘give and take’. 

Falta di deseo of placer sexual

Tin hopi cos cu por influencia bo experiencia sexual. Stress, obligacionnan como mayor, salud mental, imagen fisico y hopi otro factor por causa un impacto ariba bo deseo sexual. Trauma causa pa situacionnan doloroso di pasado por ta factornan determinante pa bo libido sexual y asta por afecta bo abilidad pa yega na orgasmo. Ta importante pa sa, cu tin diferente forma di ayudo pa esakinan. Sex entre adulto ta un parti normal di bida cu tambe ta rekeri atencion. Busca ayudo pa mehora bo bida sexual no ta suppose di ta un berguensa of taboo. 

 

Pa mas informacion, bishita e website www.intima-c.com na unda bo por encontra entre otro tips, informacion na papiamento, productonan y videos di After Dark, un programa dedica nan habri e conversacion tocante sexualidad y intimidad den pareha. Intima-C ta ofrese tambe e servicio di online coaching y consulting personal of di pareha. Pa mas informacion, e-mail: info@intima-c.com