Home Local Departamento di Registro Civil y Censo den cooperacion estrecho cu Aruba Bank...

Departamento di Registro Civil y Censo den cooperacion estrecho cu Aruba Bank Y Caribbean Mercantile Bank ta lansa proyecto piloto pa asina brinda solucion digital na cliente bancario pa cu papel di Afl 5,00.

SHARE

Oranjestad, 18 december 2020 – Aproximadamente 12000 cliente mensualmente ta bishita Registro Civil y Censo of uno di e Oficinanan auxiliar di Gobierno (HBK), pa busca un “documento oficial di prueba di residencia” miho conoci como e “Papel di cinco florín”.

Un di e gruponan mas grandi den esaki ta e grupo cu mester esaki pa Banco. Registro Civil y Censo den esfuerzo pa haci e proceso di obtencion di e documento aki mas facil y pa mehora e experiencia di e cliente, a lidera un esfuerzo di innovacion den estrecho cooperacion cu e banconan cu a opta pa haci esaki.

Cu miras pa garantiza e privacidad y seguridad di e datos di su clientenan, Censo, Aruba Bank y Caribbean Mercantile Bank a culmina e esfuerzo exitosamente y ta programa pa start sali cu e iniciativa oficialmente dia 21 december 2020. Riba e fecha aki tur cliente di Aruba Bank y Caribbean Mercantile Bank lo tin e opcion di duna autorizacion na nan banco pa asina banco mes por consulta esaki digital y haya e información cu tin riba e documento di cinco (5) florin, pues sin cu e cliente tin nodo di bay Censo of HBK mas.

E banconan ariba menciona lo guia nan clientenan e manera con e proceso aki ta. Censo y su team ta expresa satisfaccion cu e resultado di e colaboracion cu Aruba Bank y Caribbean Mercantile Bank y ta satisfecho cu awor miles di cliente tin un opcion digital. Esaki ta un iniciativa mas y semper unda cu por, lo sigui digitalisa procesonan y proceduranan pa yuda mehora e experiencia general di e cliente.