Home Local Monumentenfonds Aruba rumbo pa 25 aña di existencia

Monumentenfonds Aruba rumbo pa 25 aña di existencia

SHARE

Aña 2020 tabata sigur un aña cu hopi reto pa Aruba y tambe pa Stichting Monumentenfonds Aruba (SMFA).
Debi na e crisis crea pa e pandemia di Covid 19 hopi cos a cambia y pa Monumentenfonds esaki no tabata e excepcion.  Apesar di e situacion dificil e fundacion por wak bek atras na un aña caminda nos a logra completa varios proyecto, asina cumpliendo cu nos meta principal di mantencion di monumentonan na Aruba.
Despues di e shelter in place SMFA a opta pa continua cu proyectonan ya planea pa asina contribui tambe na Aruba su desaroyo economico. 

Proyectonan

Na principio di aña SMFA a  celebra e finalisacion di e proyecto di restauracion di Uncle Louis Store.
E monumento  aki di aña cincuentiun a keda restaura completamente y awor ta oficina di Directie Natuur en Milieu. Esaki a bira e di tres monumento cu SMFA a restaura na San Nicolas. E proyecto aki tambe ta participando pa e ‘Pieter van Vollenhoven prijs’ na Hulanda. E ta un premio cu ta wordo otorga tur aña na un particulier of organisacion cu a enfrenta e reto di preserva un monumento den Reino Hulandes y duna esaki un destinacion nobo.  Debi na e situacion di covid 19 a pospone esaki pero nos ta spera cu e bunita proyecto aki lo por gana e premio otro aña.

Na juli SMFA a celebra e finalisacion di e proyecto di restauracion di e Forno di Kalki den Rancho y a firma un acuerdo di uzo cu Stichting Rancho pa uzo liber di e Forno di Kalki como parti di nan tournan y asina continua cu e trabou cu e Fundacion a bin ta haci e ultimo añanan pa educa y conscientisa e comunidad tocante e historia di e bario di Rancho. 

Na mitar di aña a tuma lugar cuatro destaho publico tres pa mantencion di Henriquez Pand, Weststraat 15, California Lighthouse y un pa restauracion di edificio di Ex Botica Aruba na Steenweg 19. E proyecto di restauracion a inicia na fin di augustus y ta den man di e contratista Van Kessel Havenbouw NV. E restauracion ta solamente di e parti exterior pa motibo cu ainda no tin un huurdo  p’e edificio. Asina cu SMFA logra haya un partido interesa, lo sigui cu e di dos fase di e proyecto cual lo ta e renobacion di paden segun necesidadnan di e huurdo.

Pa locual ta trata e edificio di Weststraat 15, conoci bou di nomber di Casita Geel, a haya e debido mantencion y a haci algun adaptacion p’e huurdo nobo cual ta Patio 15. Entrante december Patio 15 lo habri su portanan pa publico. Di parti di e team di SMFA nos ta deseanan hopi exito.

Un otro monumento cu a haya mantencion e aña aki ta Henriquez Pand na Schelpstraat. A verf e edificio completamente di pafor , a repara murayanan y verf paden y tambe a drecha e balcon di palo completamente.

Pa locual ta trata e Faro di California, e proyecto lo inicia na 2021.


Conscientisacion, educacion y cooperacion

Un otro parti importante di e tareanan di SMFA ta e conscientisacion y educacion.  Na principio di aña SMFA a haya bishita di Seccion Desaroyo di Curiculo di Departamento di Enseñansa. Esaki tabata parti di nos proyecto di ‘invitado di luna’ pa asina sera conoci cu diferente organisacionnan y tambe cu nan por conoce un tiki mas di e trabou di SMFA. 

Un bunita proyecto cu ta e resultado di ‘invitado di luna’ ta e instalacion di un traplift na e edificio di Stadhuis.  Plataforma pa personanan cu limitacion a tene un reunion aña pasa cu SMFA y a indica cu un di e edificionan cu mas ta desea pa por tin mas accesibilidad ta e stadhuis. SMFA a traha riba e peticion aki y ta hopi orguyoso di por a haci esaki un realidad.

Na october a organisa e di cinco edicion di Wiki Loves Monuments Aruba cual a resulta un exito total cu 742 fotografia participante. Diez fotografia a keda nomina pa participa na e competencia internacional cual lo tuma lugar den januari y lo anuncia e ganador na februari 2021.

Debi na e situacion di Covid 19 e aña aki SMFA no por a haci charla na scolnan. Pero si a traha riba un audiobook cu e titulo ‘Un Raton den Stadhuis’ cu e meta pa introduci e palabra monumento na muchanan entre cuater pa ocho aña. SMFA a manda esaki pa scolnan preparatorio y primario . Un y tur por scucha e audiobook riba nos pagina di Facebook; Stichting Monumentenfonds Aruba.

Cooperacion internacional sigur ta di suma importancia pa SMFA por eherce su tareanan di mantene e monumentonan di Aruba. SMFA tin un bon relacion tanto cu coleganan di otro islanan di Caribe como cu Hulanda.

Na principio di aña e directora di SMFA, Anne Witsenburg, a haci un recorido cu Minister Knops caminda cu a mustra algun di SMFA su proyectonan na San Nicolas: Watertoren, Nicolaas Store y Uncle Louis Store y tambe a bishita e Forno di Kalki recien restaura cu e Minister.

Banda di esaki SMFA ta trahando hunto cu Stichting BOEi di Hulanda riba un haalbaarheidsonderzoek pa e tankinan di awa na Kibaima. Esaki despues cu un peticion di subsidio pa e proyecto aki a keda aproba pa ministerio di OCW di Hulanda. Ta spera cu e studio keda finalisa den e promer lunanan di 2021.
P’e proyecto aki SMFA ta trahando tambe di serca su stagiaresnan di SUS Ateliers di Hogeschool Rotterdam.

2021

2021 lo ta un aña grandi pa SMFA. E Fundacion lo ta celebrando 25 aña di existencia y ta trahando riba algun proyecto pa asina por celebra esaki hunto cu e comunidad di Aruba.
Nos ta consciente cu e aña benidero tambe lo trece su retonan cune pero nos ta scohe pa mira e futuro cu positivismo caminda hunto nos lo sigui preserva pasado pa futuro!