Home Lifestyle Esaki ta locual bo soñonan ta nifica

Esaki ta locual bo soñonan ta nifica

SHARE

Mei anochi bo ta bula lanta: un pesadia. Indudablemente bo a yega di experiencia esaki. Pero bo tawata sa, cu hopi soño y pesadia tin un motibo y nificacion? Aki ta sigui algun ehempel.

Bo ta coriendo pa un hende of pa algo
Bo ta coriendo na pia of den auto, purbando di scapa di un hende of algo cu ta siguiendo bo. E soño comun aki, tin hopi di haber cu emocionnan cu bo ta scondiendo y problemanan pa cual bo ta coriendo. E soño aki kier mustrabo cu bo ta evitando algo den bida.
Ora bo ta core pa un hende den bo soño, tambe por ta, cu den bida real bo ta scondiendo algo pa un hende. Ta importante pa purba haya sa ken of kiko ta siguiendo bo den bo soño, y dicon. Esaki por yudabo resolve un problema den bida real.

Bo djentenan ta cai
Hopi bes hende sa soña cu nan ta perde nan djentenan. Pa e soño aki no tin un splicacion concreto. Tin diferente teoria. Algun ta bisa cu e tin di haber cu insiguridad y berguensa, mientras otronan ta bisa cu djentenan ta representa poder y seguridad den bo mes.
Otro cientificonan ta bisa, cu djentenan cu ta cai ta representa frustracion sexual, perdida di control of otro forma di perdida. Banda di esey, por ta cu berdaderamente tin algo robes cu bo djentenan.

Bo ta bula of cai
Bo ta para na rand y bo ta bula of cai. Hopi hende ta experiencia cu nan ta cai den nan soño. E tin di haber cu perdida di control. E sentimiento cu bo lo bai faya ta un ehempel di esaki.
Otro motibonan di e soño fastioso aki ta cu bo ta sinti cu algo ta demasiado pabo of bo ta sintibo insigur of sin sosten.

Bo ta sunu den publico
Bo ta sunu na scol, bo a perde bo pañanan of bo ta canando sin paña ariba caya? Soñonan den cual bo ta sunu, tin di haber cu un sentido di vulnerabilidad den situacionnan social. Hopi hende cu tin e tipo di soño aki, tin miedo pa expone nan mes den bida real.
Un hende cu a haya un empleo nobo of cu ta experienciando un evento importante den bida, lo por haya e tipo di soño aki.

Bo ta yega laat
Bo ta yega laat pa un trein of un cita importante? E soño aki ta bisa mas dibo cu abo lo pensa. Tin hopi chance cu e ta bin di e gevoel inconsciente cu bo tin di no por cumpli cu expectativanan.
Hopi bes e soño aki ta bin padilanti cerca hendenan sumamente ocupa. Asta den bo soño bo por tin miedo di faya algo importante.