ROTTERDAM – E vacuna contra coronavirus, produci pa farmaceuta AstraZeneca y universidad di Oxford kisas ta menos efectivo cu su desaroyadornan a pensa. Posiblemente tin un fout den e investigacion, di cual e resultadonan a wordo publica dialuna, segun Financial Times.
Segun desaroyadornan, e vacuna lo tawata 90% efectivo cerca hendenan cu prome a haya un mitar dosis y despues di un luna un dosis completo. Den un grupo di control, cu a ricibi dos biaha un dosis completo, e efectividad tawata 62%.
Tur dos resultado tawata bastante mas halto cu e efectividad di 50% cu e gobierno Mericano a pone como minimo, pero e resultado aki ta keda hopi atras compara cu Pfizer en Moderna, di cual e vacunanan ta mas o menos 95% efectivo.
Awor a resulta cu e 90% efectividad di e vacuna di Oxford posibelmente no ta corecto. E grupo den cual e vacuna tawata asina exitoso, no solamente tawata mas chikito cu e grupo di control, pero tambe bastante mas joven. Ningun hende cu a haya un mitar dosis y despues un dosis completo tawata mayor di 55 aña. Hende ariba e edad ey tin mas riesgo pa contrae un forma serio di coronavirus.
A wordo papia di un fout den e produccion.
E duda aki ta un mal noticia pa hendenan cu ta wardando ariba un vacuna: Hulanda a bestel via EU 11,5 miyon dosis di e vacuna di Oxford. Hopi pais ta cuminsa vacuna na december.
E accionnan di AstraZeneca a baha cu 6% den balor, despues cu un funcionario publico a menciona e duda tocante e testnan cu e vacuna. E director medico di AstraZeneca a bisa cu e diferencia no ta relevante. „Con cu bo wak e resultadonan, nan ta mas cu e minimo cu a wordo stipula.”