ORANJESTAD – E hombernan Venezolano A.M.C. y A.V. nan caso a wordo trata den Corte di Husticia. E tratamento a sosode via video conference, caminda tanto A.M.C. y A.V. a admiti di ariba 21 Augustus 2020 a trece Aruba 12 hende ilegal for di Venezuela.
Aruba Native por a compronde cu Fiscal a señala cu entre e 12 hendenan tabatin 3 mucha. Ta asina cu A.M.C. y A.V. lo a haya 400 dollar pa haci e trabou aki. E boto den cual nan a bin Aruba, segun Guarda Costa no tabata den condicion pa navega laman grandi. E boto no tabatin salba bida, no luz, no sistema di navegacion. Danki Dios ningun hende a fayece. Fiscal a mustra cu traficacion di hende ta trece problema pa Aruba. Apesar cu e frontera entre Aruba y Venezuela ta sera, toch ta trece nan. El a exigi pa A.V. 14 luna y pa A.M.C. 18 luna di prison. E boto a wordo destrui entretanto.
Hues a sera tratamento di e caso y a dicta sentencia di biaha. Hues ta haya legalmente proba cu A.M.C. y A.V. ta culpable di traficacion di hendenan ilegal riba 21 Augustus 2020. Tambe cu a pone e hendenan nan bida den peliger door di cu e boto no tabata den condicion pa navega. Hues a remarca, aunke cu e situacion di Venezuela ta hopi dificil, esaki no ta sistema pa trafica hendenan ilegal. Esaki ta crea un situacion hopi dificil pa Aruba. Hues a bisa cu siguiendo orientacion di Hof pa cu castigo, el a condena A.M.C. na 14 luna di prison y A.V. 10 luna di prison.