Investigadornan ta confirma transmision di virus no comun na Bolivia

Chapare virus, cu ta causa kentura hemoragico, a wordo transmiti pa trahadonan di salud na La Paz, locual a resulta den tres morto.
Investigadornan di US Centers for Disease Control and Prevention a descubri un transmision entre humano, di un virus poco comun na Bolivia, cual virus ta pertenece na un famia di virus cu por causa kentura hemoragico, manera Ebola.
E noticia aki ta un recordatorio, cu scientificonan ta sigui traha pa identifica virusnan nobo cu por nifica un riesgo pa e ser humano, asta awor cu paisnan rond mundo ta bringando un ola nobo di Covid-19.
Scientificonan a bisa cu na 2019, dos paciente a transmiti e virus pa tres trahado di salud na La Paz. Un di e pacientenan y dos trahado di salud a fayece. Solamente un brote chikito di e virus aki a yega di wordo constata na 2004, den e region di Chapare, situa 370 miya este di La Paz.
E virus ta wordo carga door di djaca, cu despues a pasa esaki pa humanonan. En general, virusnan cu ta wordo transmiti door di fluido humano, ta mas facil pa contene cu virusnan respiratorio manera Covid-19.
Sintomanan di e virus aki ta entre otro kentura, dolor di barica, sacamento, y dolor tras di wowonan. No tin remedinan specifico pa e malesa aki, pues pacientenan ta ricibi solamente cuido mediante fluido intravenoso.
Investigadornan ta bisa cu ta posibel cu e virus aki tawata existi pa añas sin a wordo detecta, pasobra e tawata wordo diagnostica como dengue, un virus cu sintoma similar. Scientificonan ta bisa cu mas estudio ta necesario, pa por compronde e capacidad di e virus pa causa epidemia.