ORANJESTAD, Aruba – Despues di 7 luna y mey ta warda pa loke ta e desaroyonan rond di COVID-19, Arubaanse Voetbal Bond (AVB) a wordo informa cu minister di deporte a duna autorisacion siman pasa cu por reactiva deporte. Cu esaki ta permiti AVB organisa un torneo y/of su Campeonato y esaki tabata un bon noticia pa e mundo di e deporte futbol na Aruba.
Manera nos sa, tabata intencion di AVB pa organisa un festival di futbol pa muchanan di U-5 y U-7 y un pre-campeonato pa U-9 y U-11, pero lamentablemente na ausgtus esaki no por a continua debi na e casonan cu a bin ta aumentando drasticamente. “Nos como un organisacion responsabel y profesional, a haci tur e preparacionnan necesario pa por a organisa e festival y e pre-campeonato,” Harvey Clement, competitieleider di AVB, a bisa. No a costa nos nada pa sigui traha.
Pa por a organisa e festival y pre-campeonato, ta diferente reunionan a tene cu IBiSA riba un base, practicamente diario pa keda haya informacionnan. Pafo hopi hende tabata bisa cosnan, pero nos a cana e canalnan oficial y tabata monitor te na momento cu minister a informa cu por cuminsa. AVB tabata prepara caba te cu 12 aña, pasobra esey si tabata por.
Nos a hinca den otro un festival di futbol pa muchanan di U-5 te cu U-7 y un pre-campeonato di U-9 te cu U-11, cual edadnan tabata mag di inicia cu e actividadnan door di DVG. Nos a tene un presentacion via zoom, unda a presenta e reglanan p’e festival y e pre-campeonato aki na tur e miembronan. Tambe a presenta e parti di mas importante cu ta e protocol cu e dirigentenan di e clubnan miembro tin di atene na mes na nan. Clement a expresa di ta convenci cu tur hende lo comporta bon y mantene na e protocol vigente.
E intencion ta pa den un forma ordena y structura yega bek na por organisa un campeonato. Si organisa e festival y e pre-campeonatonan aki bon, gobierno por bisa cu federacion ta cumpli, mayornan ta cumpli, team ta cumpli y eora e por hasta flexibilisa pa permimti fanatico na stadion. Na e momentonan aki ta djis concentra riba e parti di trece muchanan bek veld.
E actividad a start sali 14 di november, cu weganan na tres stadion, esta Centro Deportivo Frankin Bareño na Piedra Plat, Centro Deportivo Trinidad na Dakota, Centro Deportivo Frans Figaroa na Noord. Tin wega na tres stadion, pero mesun ora. U-5 y U-7 ta parti mainta y ta tene cuenta cu no por tin aglomeracion, a parti nan den diferente orario. Desde 8:30 pa 10:00 di mainta tin U-5 y U-7, despues pa 3:30 di atardi tin U-9 y U-11 ta reparti pa mantene e regla di protocol.
