Trump ta entama caso sumario tocante eleccion na Pennsylvania

WASHINGTON – E team di campaña di presidente Mericano Donald Trump a entama un caso sumario tocante eleccion na e estado di Pennsylvania. E team di Trump a acudi na hues pa purba evita cu e funcionarionan electoral ta declara e democrata Joe Biden como ganador oficial di eleccion na e estado di Pennsylvania.
Den e documentonan entrega na corte tin poni, cu e sistema pa conta votonan via post na Pennsylvania ta carece di transparencia ya cu no por wordo controla mescos cu esaki ta wordo haci cu votadornan cu bai vota en persona.
Desde cu Biden a wordo anuncia como ganador door di e media Mericano diasabra pasa, Presidente Trump a anuncia cu e lo bai bringa e resultado aki na corte.
Dialuna algun fiscal mayor Republicano den diferente estado a manda peticion na Corte Supremo pa stop e extra tempo duna door di Pennsylvania pa conteo di e votonan cu a wordo manda laat. Na Pennsylvania votonan ta wordo considera como legal, si esakinan wordo manda dia di eleccion y ricibi te cu 3 dia despues di eleccion.