Despues cu Gobierno di Aruba a termina e contract cu Citgo, Citgo a cumpli cu nan deber y a paga 16 miyon dollar manera cu ya Prome Minister Evelyn Wever-Croes a anuncia na Parlamento. E placa, Prome Minister a enfatisa, a bin na bon momento ya cu Gobierno no tawata haña entrada di impuesto.
Prome Minister a encarga un ‘advisory committee’ bou di liderazgo di director interino di RdA sr. Arends, pa nan haci e ‘public tendering’. Esaki, Prome Minister a duna di conoce, ta un comision totalmente independiente caminda cu Gobierno ni e hunta di comisario di RdA no tin un rol importante den esaki mustrando asina cu e escogencia riba e miho candidatonan ta wordo haci door di profesionalnan di Aruba. Despues di escogencia di candidatonan, ta consulta Gobierno pa e decision final. Di e manera aki tambe e ciudadano por tin trankilidad y pa no tin duda riba e integridad di e proceso.
E REOI-1 ta bayendo hopi bon cual ta esun pa e refineria mes. Prome Minister a duna di conoce cu hopi sigur pronto lo tin bon noticia pa comparti cu Aruba. REOI-2, cu ta pa otro desaroyo economico, ta bayendo bon tambe. Deliberacionnan ta andando pa cu esakinan.
Prome Minister a elabora riba e diferente alternativanan di esunnan cu a haci oferta pa e REOI-2. Entre otro, desmantelacion completo di e tereno; industria sostenibel; energia sostenible; haci di Aruba un isla circular sostenible; un desaroyo di un yachthaven; desaroya un zona residencial; condominium; hotel y; warehouse grandi. Awor ta den e proceso pa wak si e opcionnan aki ta genera e cupo di empleo y desaroyo economico compara cu refineria. E bon noticia, Prome Minister a enfatisa, ta cu un no mester exclui e otro pasobra por haci nan banda di otro cual ta trece un bista hopi mas interesante pa Aruba.
Prome Minister a indica tambe cu a tene cuenta cu e standarnan di medio ambiente y e puntonan di salida di e Metanan di Desaroyo Sostenibel.
Prome Minister hunto cu e Director di RdA, sr. Arends, pronto lo presenta na prensa e procedura di tanto REOI-1 y REOI-2 manera cu el a wordo splica den Parlamento.