Home Local Hopi entusiasmo y motivacion pa implementacion di Codigo di Proteccion den sector...

Hopi entusiasmo y motivacion pa implementacion di Codigo di Proteccion den sector di Salud

SHARE

Oranjestad – Aruba: A pesar di e retonan cu Covid-19 ta trece cu ne, Sector di Salud den su implementacion di Codigo di Proteccion a logra di organisa diferente encuentro di introduccion, mediante e plataforma di Zoom cu diferente grupo di profesional den e sector di Salubridad. Den e siman atras a reuni cu HAVA; e organisacion di dokternan di Cas, como tambe e Asociacion di Dentistanan y esun di Mondhygienisten, pa asina informa y prepara pa e nulmeeting di cada grupo di profesional. 

 

E encuentro cu Respaldo tabata uno hopi fructifero y den cual a keda palabra cu lo start up e nulmeeting, pero tambe kico tur mester sosode a corto plazo, pa por logra e implementacion di e Codigo di Proteccion. Cu e nulmeeting di e diferente grupo di professional, nos lo haya un bista mas amplio di tur loke ta necesario pa logra un implementacion exitoso. Loke ta resalta masha hopi ta e entusiasmo y motivacion di nos profesionalnan pa aporta na un topico asina importante den nos communidad. 

 

Manera nos a bin ta señala e reto entre e aspecto di ‘medisch geheim’ y e siguridad di mucha, tin nos debido atencion. Un otro aspecto importante ta e asina yama ‘handelingsverlegenheid’ di e profesional. 

 

Cu e trayecto di implementacion nos lo bay presta atencion na esaki y traha na yuda e profesional bira mas consciente di e señalnan y kico pa haci cu esaki den practica. ‘Handelingsverlegenheid’ ta un tema cu no tin hopi literatura disponibel. E articulonan cu ta keda publica tocante esaki tin nos atencion y sigur nos lo kier sa mas di esnan den practica con e profesionalnan na Aruba ta experencia esaki. Por ehempel un comunidad chikito, miedo di represaya di un mayor contra e profesional,  y tambe e cuido pa cu nos profesionalnan y nan forma di descarga  y trata cu e peso cu un funcion ta trece cu ne den practica. Hunto cu e oficina di Calidad den Salubridad cu recientemente a keda institui lo bay traha riba e topico aki. E meta ta, pa organisa un dialogo (overlegtafel) encuanto e topico aki. 

 

Codigo di Proteccion ta cay bou di auspicio di Sociaal Crisis Plan (SCP) y e meta di e trayecto aki ta pa implementa e Ley den luna di november di 2020. Codigo di Proteccion ta un di e proyectonan di SCP cu lo forma e fundeshi solido pa locual ta trata e sistema nacional di proteccion di mucha y hoben na Aruba.