Home Local Ganadornan di Wiki Loves Monuments Aruba 2020

Ganadornan di Wiki Loves Monuments Aruba 2020

SHARE

Den luna di September, den cuadro di luna di Monumento, Stichting Monumentenfonds Aruba (SMFA)  a organisa e di 5 edicion di Wiki Loves Monuments Aruba.

Wiki Loves Monuments ta un competencia di fotografia cu e meta pa documenta monumentonan rond mundo, un total di cincuentitres pais a participa e aña aki na e competencia. Cada pais ta organisa un competencia local y di esaki ta nomina e dies mihor fotografianan pa sigui cu e competencia internacional cu lo tuma lugar na fin di aña.

Pa locual ta e competencia local nos a ricibi un total di 742 fotografia. E hurado di e competencia local consistiendo di Van Gassant, Walter Mohammed y Anne Witsenburg, a scohe e diez mihor fotografianan pa continua  cu e competencia internacional y di e diesnan aki a scohe un ganador di e categoria uno cual ta e categoria di Monumentonan proteha y un ganador di e categoria 2 cual ta Monumentonan no proteha.

E di dos categoria ta principalmente pa SMFA por haya un impresion di kico e comunidad ta considera edificionan cu un balor monumental.
Solamente e fotografianan di e categoria uno lo por wordo nomina pa e competencia internacional. E resultado di e competencia internacional lo wordo anuncia na februari 2021.

Ganadornan di Wiki Loves Monuments 2020 a resulta Bea Croes cu un fotografia di Ex Hotel Colombia y ganador di e categoria dos a resulta Dyanne Lopez Schipper cu un cas di cunucu den Parke Nacional Arikok.

E otro nominadonan cu tambe lo sigui participa pa e competencia internacional ta: Xie Marie Larmonie, Jeroen Lucas (2x), Nohemy  Habibe, Jesse Rasmijn (2x), Seagullbayaruba, Rose Willems.

Tur e nominadonan a ricibi un certificado y nan fotografia riba di print riba metal pa asina por keda cu un bunita recuerdo di nan participacion na Wiki Loves Monuments Aruba 2020.

Stichting Monumentenfonds Aruba kier stimula tambe pa personan cu kier contribui boluntariamente pa agrega historia di e monumentonan aki na e fotografianan por haci esaki libremente via Wikipedia.
Si bo ta un persona cu ta gusta haci investigacion y skirbi articulonan den bo tempo liber. Wikimedia semper ta buscando mas boluntarionan pa yuda expande e informacion tocante monumentonan y cultura di aruba cu articulonan riba nan encyclopedia. Wiki Goes Caribbean ta enfoca e ultimo añanan na stimula e creacion di mas contenido den e area di caribe principalmente riba temanan di historia y cultura.