Home Politics Parlamentario Richard Arends (AVP) Empleo, recuperacion economico y aspectonan social ta...

Parlamentario Richard Arends (AVP) Empleo, recuperacion economico y aspectonan social ta e retonan berdadero di nos pais

SHARE

 

 

Segun Arends, mirando e situacion den cual nos ta bibando aden aworaki, e posponemento di tratamento e reunion publico aki, na unda lo a trata presupuesto supletorio 2020 dialuna ultimo, ta contribui na e incertidumbre cu nos ta bibando aden caba. “Nos ta na luna di october y nos no a ni ricibi e najaarsnota – informe di ehecucion di prespuesto di aña 2020 – y mucho menos e prespuesto pa aña 2021,” Parlamentario mr. drs. Richard Arends di fraccion di AVP a bisa durante entrevista. “Nos por wak cu nos hermana isla Corsou si a logra trata su presupuesto 2021 y nos ainda ta pega na presupuesto supletorio 2020.”

 

No ta desconoci cu gobernacion di Aruba ta bibando momentonan di incertidumbre y duda riba tereno politico. “Ainda no tin movecion pa loke ta trata e posicion di Gobierno di Aruba pa cu Hulanda. For di September no a tende nada mas, excepto cu Corsou lo a yega na un acuerdo y Hulanda ta sigui su rumbo. Parlamento di Aruba lamentablemente no ta wordo informa riba unda nos ta cu e negociacion nan.”

 

“Nos tur cu ta biba na Aruba ta ripara cu recuperacion economico ta bayendo hopi mas lento cu a wordo premira inicialmente y na momento cu a habri frontera nos tabata sa cu nos lo bay tin retonan di saludbridad publico cu a resulta den un di dos ola di contagio di COVID-19 hopi grandi,” Parlamentario Arends a splica. “Ta desconoci pa nos kico lo ta e maneho si bin un di tres brote di contagio y kico nos a siña di e prome dos brotenan pa por contene e contagio mihor.”

 

“E recuperacion lento cu Aruba ta experienciando tin retonan enorme pa comercio, actividadnan economico nobo, empresanan mediano y chikito y horeca cu ta esunnan mas afecta den e periodo aki,” Parlamentario Arends a enfatisa. “Tambe e retonan riba mercado labora, cu ta parce di ta e olifanti blanco den sala cu tur hende ta wak, pero niun hende ta papia di dje.” A pesar di e preguntanan hasi por escrito pa e parlamentario, gobierno ta mantene un silencio hermetico pa loke ta trata su maneho riba e parti aki.

 

Den luna di maart Gobierno a presenta un presupuesto teniendo cuenta cu un worst case scenario cu a resulta den e un deficit di 1.6 biyon florin. “Fraccion di AVP a boga pa e presupuesto wordo presenta den fase y awe nos ta wak cu e presupuesto supletorio ta tene cuenta cu un caida economico di rond di 30% enbes di riba 44% manera pronostica inicialmente.” Fraccion di AVP ta contento di wak cu gobierno a cumpli cu esaki y a presenta un presupuesto supletorio cu pronosticonan financiero hopi mas realistico.

 

Segun Arends, Aunke cu e caida economico ta menos fuerte, su efecto riba finansa publico, economia, mercado laboral y e aspecto social ta sin precedente. “Ta ser pronostica cu aki cinco aña Aruba lo ta back na cifranan prome cu COVID. Mientras cu Gobierno a presenta un plan pa termino largo cu contribucion di hopi experto, tin un ausencia di maneho riba termino cortico pa empresanan mediano y chikito cu ta e weso di lomba di nos economia. E pregunta clave ta: con e empresanan mediano chikito, e artista, e trahador independiente lo sobrebibi te ora cu nos economia recupera manera cu nos tabata custuma cune na aña 2019.”