Home Politics Prome Minister Evelyn Wever-Croes: LANSAMENTO DI E CARA NOBO DI CENTRO...

Prome Minister Evelyn Wever-Croes: LANSAMENTO DI E CARA NOBO DI CENTRO DESAROYO HENDE MUHE, CEDEHM 2020

SHARE

 

 

Diamars 20 di October 2020, CEDEHM ta lansa su cara nobo. Prome Minister Evelyn Wever-Croes pa e ocacion importante aki, a habri e evento di e lansamento di e Cara Nobo di Centro Desaroyo Hende Muhe, CEDEHM 2020 enfatiando e trabounan importante di e fundacion aki y gradiciendo nan pa e trabounan cu nan ta eherce den nos comunidad. 

“Forsa y resiliencia ta lo cual ta defini e hende muhe den 2020. Cu determinacion y cu un boluntad di hero, hende muhenan ta den posicionnan di liderazgo. Den mi posicion como e prome Minister President femenino mi ta duna awe un palabra di pabien, y exito na e lansamento di CEDEHM. Un team cu a ser re-ekipa cu e personal necesario pa por brinda nan servicio. 

CEDEHM su meta principal ta ancra den e convenio di Cedaw, Convention on the Elimination of Discrimination Against Women. 

CEDEHM ta duna caracter structural y duradero na proyectonan pa desaroya y fomenta mehoracion di e posicion di e hende muhe na Aruba. Asina creando igualdad entre e generonan cu enfoke riba e posicion di e hende muhe. Awor varios posicionnan clave ta den man di hende muhe. Pa prome biaha den historia tin 3 hende muhe minister, tin 7 Parlamentario hende muhe, tambe tin mas posicionnan clave cu ta wordo ocupa pa hende muhe, recientemente KorpsChef. 

Asina mes tin luga pa mehoracion di e posicion di desbentaha di nos hende muhe. CEDEHM ta boga pa equidad di genero y tin proyectonan di conscientisacion den e area aki. 

Mundialmente y mas ainda den latino America y den Caribe, e pandemia di Covid-19 a afecta e hendenan muhe den un manera desproporcional. Lansando nan bek den e rolnan tradicional di cuido cu no ta remunera. E hecho aki ta laga nos hendenan muher den posicionnan sumamente vulnerabel y dependiente. Cu e lansamento nobo di CEDEHM lo pone atencion na e situacionnan aki, cu campañanan di conscientisacion, pa cada miembro di e famia carga nan parti finalmente. Un comunidad fuerte ta ser crea door di ciudadanonan fuerte y empodera, y cu ta duna e mihor di nan. 

Como Minister President mi ta felicita CEDEHM cu lansamento di e cara nobo di CEDEHM y mi ta desea boso hopi exito cu e futuro proyectonan. 

Ban sigui duna di nos parti pa empodera nos hende muhenan, pasobra nos hende muhenan por logra tur loke nos propone nos mes. Conta cu mi den esaki”, Prome Minister Evelyn Wever-Croes a enfatisa.