Nos por a tuma nota cu despues di a haya basta reaccion tocante e ley di screening, Parlamentario Independiente, sra. Lejuez, a saca un relato den media, titula ‘DAPHNE LEJUEZ TA RETA PA PASA LEY CU TA INCLUI SCREENING DI ACTUAL MINISTER Y PARLAMENTARIONAN TAMBE’. Nos no por permiti pa loke sra. Lejuez ta trece dilanti den e articulo aki keda na palabra so. Nos lo desea pa Parlamentario Lejuez cumpli cu loke e ta propone, Parlamentario Tevreden a remarca.
Ta asina cu Parlamentario Lejuez a usa un cantidad di pretexto ora cu e a scohe pa bira independiente. Entre otro, cu fraccion di MEP tawata pone bou di presion, cual ta un mentira flagrante. E tempo ey hopi a kere loke sra. Lejuez a trece dilanti, pero poco poco por a nota cu tawata un strategia di sra. Lejuez esaki tawata pa por a cumpli cu otro plan y proposicionnan cu e tin den mente. Durante e tratamento di ley di screening ministers esaki a bira mas cla cu nunca, ora cu en bes sra. Lejuez a para na banda di e ley conseha pa Raad van Advies, a scohe pa para na banda di AVP pa converti e ley di screening ministers den un ley pro corupcion.
Screening pa un, Screening pa tur
Otro punto den e ley di screening pakico sra. Lejuez a vota contra tawata, cu ministernan actual tin di bolbe pasa screening siendo cu nan a caba di pasa un screening. Algo cu nos no tin un problema cu ne tampoco. Mi ta convenci cu ministernan di MEP lo pasa screening atrobe, y no lo dura hopi tempo tampoco pa por pasa esaki. Den e reunion sra. Lejuez a vota pa inclui e amienda di RED den e ley, esta pa no test ministernan pa uso o si nan a wordo deteni pa posesion di cannabis. Akinan bo por mira claramente cu sra. Lejuez no ta consistente den su ponenciannan, pero mas bien ta busca pa come den tayo di RED y AVP pa e por logra su plan cual sea cu e ta. Con por ta cu ley di posesion y uso ta conta pa tur piloot, polis y juffrouw pero pa cu ministernan esaki no tin di conta? Wereld op zijn kop cu sra. Lejuez. Si (ley) screening ta conta pa un, (ley) screening ta conta pa tur!
E ley tin di conta pa Parlamentario tambe
Den desesperacion sra. Lejuez a publica e relato ya menciona presumiendo cu fraccion di MEP lo sucumbi y no lo bini mas cu e ley Parlamento, al contrario, mi ta ret’e pa para tras di su publicacion y presenta un amienda cu e cambio pa e ley di screening conta pa Parlamentarionan tambe. E realidad ta cu asina cu esaki tuma lugar, hopi colega lo tin di bandona Parlamento y no lo por bolbe pasobra nan no lo por pasa e screening. Ta keda na Parlamentario Lejuez awor pa e mustra na cua banda e ta para y no dobla.
Conclusion
E ley di screening ministers lo haya su caminda bek pa Parlamento pronto. Y nos kier pa pueblo sigi e reunion aki, pa mira cu si Parlamentario Lejuez lo presenta di boca paden e reto cu a trece den prensa di boca pafor. Nos lo no hala atras y lo vota pa e ley aki wordo concretisa y pasa den sala. Pasobra e meta di e ley di screening ta, pa Aruba por tin un eleccion cu candidatonan cu ta integro, honesto y cu lo traha pa caha di pueblo, y no pa esun di nan mes, Tevreden a termina bisando.