ORANJESTAD – Sharina Gumbs ta forma parti di e grupo di profesionalnan cu a sigui nan cursonan di Exprodesk na Departamento di Asuntonan Economico, na un manera continuo y hunto cu algun otro dama a yega na e nivel di Master Class “From Zero to Hero: Mastermind- Empowered Women Exporters” presenta pa un export coach internacionalmente reconoci cu ta sra. Taiana Mora di NEX Consulting. Den e proximo temporada Exprodesk ta bay “showcase”/profila integrantenan di e Master Class aki y conta un tiki di nan experiencia y kico tur nan ta logrando riba e area di exportacion. E focus principal ta pa e grupo aki di “Empowered Women Exporters” internacionalisa nan productonan, talentonan/servicionan den e mas amplio sentido di palabra.
Cu esaki Exprodesk tin como meta pa encurasha y stimula mas di nos hende muhernan profesional cu tin e potencial pa exporta, cu nan tambe lo por logra esaki door di cera conoci cu e hende muhernan di “Empowered Women Exporters”.
Exprodesk su ‘Empowered Women Exporter’ Sharina Gumbs ta fundadora di Soul2Soul – Mindful Art, Transformational and Creative Coaching for Teams, Management & Profesionals.
Entre 2010 pa 2019 Sharina a exhibi su obranan di arte na varios paisnan na Europa, Aruba y Merca. Na 2020 Sharina a gana e premio Hulandes “De Gouden C” pa su proyecto di ‘Re-fill your cup with authenticity’ (yena bo copi cu autenticidad).
Tempo Sharina tawata un mucha, Sharina tawata hopi introverto y verlegen, sinembargo ela haya un forma pa expresa su mes y duna un nificacion na e mundo rond di dje. Su interes den e caracter humano y desaroyo di identidad a hib’e pa studia trabou social (1993-1998) y despues un educacion den sciencia di comportacion/orthopedagogia (2007-2012).
Na 2009 –mientras e tabata traha simultaneamente como un guardian familiar, e tabata studia Orthopedagogia y criando 2 yiu di su mes como un mama soltera- Sharina a dicidi pa bai sigui un educacion part time den arte (2009-2012) na ‘De Nieuwe Akademie’. Na 2014 Sharina a muda bek pa su isla natal Aruba pa sigui su soño di bira un artista profesional y di un manera of otro combina esaki cu su studio di trahadora social.
Sharina Gumbs ta un artista visual abstracto y ta haci obranan colorido y dinamico cu ta refleha identidad autentico. Desde 2010 pa awor Sharina a expone su arte na Europa y Merca. Pa medio di su organisacion Soul2Soul Mindful Art – Transformational & Creative Coaching for Teams, Management & Professionals, Sharina ta desaroya workshops pa individual como profesionalnan. Den un workshop, participantenan di e sesionnan creativo di coaching ta siña tecnicanan basico pa crea un obra di arte abstracto, mientras nan ta explora nan vulnerabilidadnan den un manera divertido y nan ta mehora nan comunicacion y abilidadnan di resolve problema, di manera cu nan por expresa nan mes mihor y por enfrenta stress y otro cambionan na trabou.
Cuminsando desde dialuna dia 28 di september cu Soul2Soul-Mindful Art Gallery (Aruba) ta facilita e serie di workshop di 3-dia di “Mindful Art” na Cas di Cultura. Cu e tipo di arte aki, e participante ta laga tur ansiedad cu den ultimo tempo ta afectando nos bay, kita stress y crea su mesun realidad retando nan mes den un forma hopi divertido pa traha riba nan desaroyo propio. E prome workshop dialuna dia 28 di September ta ‘Refill your cup with authenticity’. E di dos workshop ta yama ‘Reality-Check’ cu ta diamars dia 29 di september y e di tres dia e workshop ta yama: ‘Design your personality’ cual ta esun final diaranzon dia 30 di September 2020.
Diahuebs dia 1 di October 2020, e artista Sharina Gumbs lo ta expone su arte den un exposicion ‘The essence of me’.
Entrada pa e workshopnan ta disponibel na Cas di Cultura of via Soul2Soul -Mindful Art Gallery (+297-7491217)