Home Politics AVP ta presenta relato di Brainstorming: “Covid 19 den Perspectiva”

AVP ta presenta relato di Brainstorming: “Covid 19 den Perspectiva”

SHARE

Mientras cu e epidemia di COVID-19 a afecta salud, economia, enseñansa, contacto social y practicamente tur sector na Aruba, ciudadanonan y organisacionnan ta purba compronde y anticipa riba e efectonan a corto y largo plazo di e epidemia aki. Cu e meta pa contribui na un miho comprondemento di e epidemia y su consecuencianan, partido AVP a tene un serie di encuentro cu expertonan medico, social y di enseñansa, pa haya tende di nan con nan a atende cu e situacion cu e virus y e enfermedad contagioso aki a crea, kico ta e daño cu ela causa, dicon ela sosode y kico mester wordo haci pa nos comunidad ta miho prepara pa crisisnan similar den futuro.

E encuentronan informativo aki a tuma luga dia 20 di augustus 2020. Basa riba e informacion cu a presenta door di experto, a compila e relato “COVID-19 DEN PERSPECTIVA”.

E relato aki ta pone atencion especifico riba e forma cu a atende cu e aspectonan medico (cuido fisico y mental), e cuido den hospital, e consecuencianan pa hobennan y pa
enseñansa. A base di e informacion cu a presenta, e informacion cu Departamento di Salud Publico (DVG) ta publica y di informacion di organisacionnan specialisa manera World Health Orgnaization (WHO), a saca algun conclusion y haci algun recomendacion pa
maneho di un crisis similar den futuro. Cu e informacion den e relato aki, AVP kier duna un aporte positivo y constructivo cu sugerencia y alternativanan di maneho di crisis y pa
organisacion di cuido di salud y organisacion di sectornan vital di comunidad.

Nos pais y henter mundo ainda ta den e crisis di salud y e multiple consecuencianan cu e COVID-19 ta crea. Ainda mundo y nos ta siña di e daño enorme cu e crisis aki ta causa pa e forma di organisa trabou, enseñansa, cuido medico y bida social manera nos tabata conoce. Mientras cu nos ta sigui e crisis aki di cerca y siña di tur loke ta sosode door di e crisis aki, nos mester fiha atencion riba con ta maneha un crisis asina pa limita e daño cu e por causa y con nos ta organisa bida den futuro bou circunstancia di e peliger pa
contaminacion di hende y e peligernan di esaki pa nan bida. Nos ta apenas na e comienso di un caminda desconoci pa futuro. E experiencia y recomendacionnan den e relato aki ta pa yuda nos siña mas y miho con pa organisa cuido di salud y bida den nos comunidad den futuro.

E raport aki lo ta disponibel pa publico riba e website di partido AVP
http://www.avp.aw y via email of Whatsapp for di miembronan di partido AVP.