Home Corte 4 aña di prison pa homber cu tabata bende cocaina y marihuana

4 aña di prison pa homber cu tabata bende cocaina y marihuana

SHARE

ORANJESTAD – Awe mainta sentencia a cay pa e hombernan J.R.V. y P.C., kendenan ta wordo acusa di bendemento di droga na Pos Chiquito. Aruba Native por a compronde cu via di tip Polis a bin haya sa di e bendemento aki y a detene e duo aki. Investigacion a mustra cu J.R.V. tabata bende pa 4 aña y P.C. a cuminsa yuda J.R.V. pa 6 luna.

Durante investigacion na e cas a confisca mas cu 2 mil florin. En total a confisca 4 saco cu marihuana 34,7 gram, 10 saco cu cocaina, 2 saco 144 gram cu piedra di cocaina y XTC.

Fiscal a exigi 5 aña di prison pa J.R.V. Pa loke ta P.C., e tabata un trahador di J.R.V. y tabata bende den un periodo mas cortico. Fiscal a exigi 1 aña y 6 luna di prison. E droga confisca lo mester wordo destrui y e otro articulonan cu tabata usa pa droga lo mester keda confisca. E placanan cu a keda confisca lo mester keda confisca.

Hues awe mainta, via video conference, a bisa cu e ta haya legalmente proba cu nan tabata bende cocaina y marihuana. Hues a bisa cu P.C. tabata bende mas o menos 6 luna. Hues a conclui esaki basa riba declaracion di testigonan y tambe P.C. Hues ta haya proba cu J.R.V. entre 2016 y Februari 2020 tabata bende droga.

Hues a bisa cu bendemento di droga ta problema so e ta trece den comunidad. El a bisa cu enfasis cu no kier bendemento di droga na Aruba. Droga ta malo pa salud di hende y ta crea criminalidad.

Hues a condena P.C. na 1 aña di prison y J.R.V., kende durante 4 aña a bende droga, Hues a conden’e na 4 aña di prison. Hues a bisa cu e droganan ta wordo destrui y e placanan cu a haya lo keda confisca.