Den conferencia di prensa di awe nochi Minister President Evelyn Wever- Croes a duna di conoce cu tin 5 caso nobo di local contagia cu COVID-19. Durante e conferencia e mandatorio a trece algun puntonan dilanti pa pueblo tene cuenta cune, esakinan tin como meta pa frena e aumento di casonan di COVID-19:
Mondkapje
1. Den areanan unda cu no por tene distancia di 1,5 meter e mandatario a urgi pa hendenan haci uzo di mondkapjes.
Deporte
2. Lo para tur deporte cu ta ‘indoor team sport’ y contact sport paden of pafo, pues deporte unda cu tin contacto di serca. Gymnan ta keda habri, y lo mester funciona segun e medidanan di salubridad cu a wordo imponi.
Restaurant y Nightclub
3. Pa restaurant ta trata di limitacion unda cada mesa por tin 4 stoel. 4 persona so por ta na mesa, y mesanan mester ta 1,5 meter leu di otro. Den restaurant y nightclubs no por tin bailamento y paramento na bar mas.
4. E areanan den establecimento conoci como e ‘bar’, mester ta sera y no por tin hende para na dje. E lugarnan aki ta keda habri pa sirbi hende na mesa.
Casino
5. Casinonan lo mester continua na sigui e protocolnan ya determina.
Aglomeracion di Persona
6.Tin prohibicion di aglomeracion den lugarnan publico. E ‘samenscholingsverbod’ ta conta pa maximo 4 persona. Esaki kermen cu un maximo di 4 persona por ta hunto den camindanan publico.
Lugar di Trabou
7. Na tur lugarnan di trabou mester tene un distancia di 1,5 meter sino mester uza mondkapjes of mester di shield pa separa hende.
Misa, Iglesia y Entiero
8. Encuentronan religioso na misa y iglesianan lo mester bay bek na e protocolnan estricto cu ya ta conoci pa nan. Na entiero tin un protocol tambe unda maximo 25 persona mag tin na cada momento.
Esakinan ta medidanan cu Gobierno di Aruba a tuma awe y cu ta bay drenta na vigor mañan. Minister President Evelyn Wever-Croes a splica cu e 5 casonan nobo ta e resultado di un falta di cumplimento cu e reglanan cu tin estableci.