ORANJESTAD, ARUBA – tabata mas cu un honor pa por a refleha ariba e trabou di conservacion. E dia mundialmente yama World Conservation Day ta wordo conmemora pa crea concientisacion ariba e mihor practicanan pa asina conserva nos recursonan natural.
Como un entitdad cu e responsabilidad di maneha aruba su reservanan natural Fundacion Parke Nacional Aruba a refleha ayera ariba e trabou incansabel cu a tuma pa awe Aruba tin mas cu 20% como areanan protegi. E trabou duro aki no ta solamente di Fundacion Parke Nacional Aruba pero sigur a cuminsa decadanan atras cu varios personanan, si mi por yamanan baluartenan cu a brinda nan tempo, conosemento, energia y passion pa cu cuido di Aruba su naturalesa pa esaki sigi folorece dia pa dia, aña aden y aña afo.
Durante un ceremonia na Parke Nacional Arikok, Sr. Norman Kuiperi, Presidente di Hunta di Supervision di FPNA a duna un reconocimento na Sra. Olinda Rasmijn pa su passion y dedicacion pa proteccion di Aruba su Naturalesa. Realmente Sra. Olinda Rasmijn su esfuerso y pasion a logra di scapa un palo di wayaca grandi di wordo rosa na momento cu a drenta fase di contruccion di e edificionan di Parke Nacional Arikok.
E fecha di ayera a wordo celebra en connecion cu siman di conservacion di FPNA. Siman di Conservacion di FPNA a inicia diadomingo ultimo cu dia international di conservacion di e ecosystema di mangel. Un siman sigur importante caminda Fundacion Parke Nacional Aruba lo sa di trese dilanti un campaña educativo por medio di nos rednan social.
