Dental Solutions ta conta awor cu dos Dentista nobo y ambos di Aruba, pa cual Dr. Ernesto Bermudez ta masha contento di mira cu nan a sigui e pasonan cu e mes a cana. Nan a huramenta via e plataforma di “zoom” siendo na Aruba, pero den un evento na nan Universidad na Costa Rica. E adkisicion nobo aki ta hopi positivo p’e clinica di dentista Bermudez, pasobra ta duna nan mas espacio pa mehora calidad di servicio y e atencion na pashentnan.
Dentista Bermudez mes a studia na e mesun Universidad aki y sa cu nan ta mantene na un standard minimo di conocemento di tecnologia moderno. E Universidad ta implementa ekiponan digital, 3D y otronan cu ta parti di e hermentnan cu ta uza diariamente.
Si antes odontologia tabata conoce mas tanto pa ranca djente y pone plancha, awendia e enfoke ta mas tanto pa percura cu e pashent ta bon informa riba con importante ta pa e por tin un sonrisa riba su cara. P’esey tin varios opcion pa solucion.
Desiree Carrion
E prome scogencia di Desiree Carrion tabata medicina, e tabata kier algo cu e ta traha mas cu hende. Na caminda el a ripara cu como Dentista e contacto cu pashentnan ta continuo, pasobra mester sigui siña constantemente. Durante estudio a ricibi hopi guia pero awo ta den posicion di tuma e decisionnan.
Inconscientemente hopi hende no ta pensa cu sonrisa ta impacta Bo bida diario masha hopi. Segun Carrion, pashentnan ta pensa hopi riba nan boca y con e ta mustra ta hunga un rol importante den bida di cada persona. E demanda den e parti di estetica a bira hopi mas grandi, tur hende kier un sonrisa mas bunita.
Luigi Carrion
Ruman di Desiree, esta Luigi Carrion, a scoge pa studia como “Marine mechanic engineer” na Merca, pero na caminda el a cambia di idea. Despues el a bay studia na Universidad di Corsou pa “Mechanical Engineering” y ora cu Valero a cera, e tabata mester di un trabou. E kier a bira Dokter pero door di gusta odontologia el a scoge p’e carera aki. Despues di 9 aña el a logra keda cla pa bira un Dentista.
Luigi Carrion a cuminsa practica caba pa mas di un luna como Dentista na Dental Solutions, unda ta haci extraccion di djente, limpiesa di djente, drecha djente y hopi mas. El a bin pa traha cu djente di hende y no pa practica, pasobra ta algo cu el a studia p’e.
Despues di e acto protocolario di huramentacion, tabatin un momento emocionante ora a kita nan toga di studiante y Dr. Ernesto Bermudez y Dr. Sandy Roga, a bisti ambos cu e cabache blanco como Dr. Carrion- Koolman. Presente na e ceremonia tabatin nan mayornan Fanchi y Mimi, Princesa Amelia, ruman Gaby, Tanchi Greta, Meneer Capelo, Dr. Ernesto y Melanie Blanco, Dr. Sandy y Jeanine Roga, Director di DVG, Drs. Jerry Staring y demas coleganan di Dental Solutions.
