Si bo no sa kico a pasa e ultimo 34 añanan cu 10 gabinete lo siguiente. Mi persona a guia 4 gabinete di cual 3 completo y un casi 2 aña pero nunca nos a yega di pidi Hulanda placa. Nunca nos gobierno a haya un aanwijzing ni KB di Hulanda. Ningun ministro di nos gobierno a bay cera pa corupcion. Cu tabata tin cos cu por a bay mihor ta sigur. Cu tabata tin eror tambe ta humano.
Maneho financiero y garantianan
Awor ban papia di maneho financiero. E deficitnan tabata responsabel y cumpliendo cu normanan cu nos mes a pone. Si a fia placa tabata pa cosnan productivo y pa paga debenan cu nos a hereda. Ningun bes nos a yega di pasa un debe di mas cu 43% di nos GDP cu segun IMF ta responsabel y manehabel.
Nos a soluciona un di e problemanan mas grandi di nos historia cu tabata e problema di mas cu 400 miyon florin na debe, esta di e fracaso di e garantianan cu e aventura di e 3 hotelnan cu a keda ruina. Ora e banco di exportacion “Sace” a gana e caso den Corte na Hulanda nan a manda cobra e “back to back guarantee” cu Aruba su gobierno (Gabinete Henny Eman) a duna nan, unda a garantisa no solamente e banconan envolvi, pero Sace tambe! Nos a bay Italia sin ayudo alguno di Hulanda cu segun art. 29 di Statuut tabata co-responsabel pa e prestamonan y nos a logra baha e debe cu 110 miyon dollar y a bay di acuerdo pa paga cash 110 miyon dollar y paga e resto den 15 aña cu interes hopi abou. Te aña pasa nos a caba di paga e debenan aki.
Nos den nos gobiernonan hasta tabata tin mas cu un aña cu surplus, esta na 2003 y 2008. E deficitnan e temponan ey tabata responsabel y manehabel financieramente.
E situacion financiero na 2009
E debe tabata desde Status Aparte di varios gobierno di pasado 2.2 biyon florin cu tabata 43% di nos GDP. Cu otro palabra di cada florin 43 cen tabata bay pa paga debe!
Y con esnan cu a gana eleccion na 2009 a haya e situacion financiero? Nos a laga 34 miyon florin cash. Na e 3% BBO a trece 196 miyon florin. Tambe a obliga gobierno Hulandes duna nos parti di e placa di e hotel di Plant NV di benta di Marriott Hotel cu tabata 250 miyon florin plus e caso cu nos a cobra BBO for di Valero cu tabata 280 miyon florin cu nos a gana den Corte na Hulanda. Pues ora nos a bay di gobierno, Gabinete Eman por a goza na e 2 sumanan aki so 530 miyon florin! Tambe tabatin mas cu 190 miyon florin den FDA, esta e fondo di nos cu Hulanda hunto. Tabatin mas cu 10 miyon florin di ganashi di Banco Central. Bo por bisa casi 1 biyon florin Mike Eman a haya cu e por a dispone di dje, plus tabatin e proyectonan grandi manera Ritz Carlton plus varios otro proyectonan tanto di gobierno como di sector priva cla cu financiamento pa ehecuta.
Unda tur e placanan a bay y dicon mester a mas cu redobla e debe, unda di cada florin na 2017, 93 cen tabata bay pa paga debe so ta nan mester splica pueblo. Mi ta corda con nos hasta a laga e proyecto pa un HAVO/VWO pa Noord y becindario cu financiamento cla. Pero FDA cu Hulanda a bay di acuerdo pa enbes di e scol usa e placa cu prioridad robez pa e proyecto di embeyecimento di Caya Betico Croes cu rails, tram, klinkers y parkeermeters cu a costa nos casi 40 miyon florin. Proyecto cu a mata mas cu 100 establecimento den dicho caya. Cu bo por cuestiona ta oke, pero tin diferencia entre nos maneho y otronan. Un contribucion cu echonan y no cu storia fabrica!