Home Politics Segun Parlamentario Benny Sevinger: Hulanda no a introduci medida pero gabinete...

Segun Parlamentario Benny Sevinger: Hulanda no a introduci medida pero gabinete Wever Croes a crea medidanan Hulanda a simpel bisa ta bon

SHARE

 

 

Loke ta circulando ultimo dianan riba medionan social y informativo, ta mustra cu pueblo di Aruba ta bay topa dianan mas dificil su dilanti, cu mas medida na caminda.

Parlamentario pa fraccion di AVP, Benny Sevinger a mustra cu tin desaroyonan cu no ta mucho alentado y mientras cu gabinete Wever Croes ta trata di sconde tras lomba di Hulanda, insinuando cu medidanan cu ta na caminda ta exigencianan di Hulanda.

Sr Sevinger a mustra cu esaki no ta berdad y tanto Minister Knops como Prome Minister Rutte a declara bon cla cu ta gabinete Wever Croes a presenta tur plan pa corta den salario di trahadonan publico y tambe plan pa baha gasto di AZV.

“Aruba tin un gobierno cu no ta para di gaña, nan no sa ora pa stop y bisa ta basta di gaña pueblo, e mesun pueblo cu nan tin sirbi su interes.

Na prome luga ta Minister Presidente Wever Croes a informa Hulanda cu tur Minister y Parlamentarionan lo entrega parti di nan salario pero na mes momento a informa Hulanda cu trahadonan publico tambe lo entrega parti di nan salario.

Esaki sin dialoga cu trahadonan, sin papia cu ningun hende, djis trata di mustra bon den bista di Hulanda, mustrando cu ta corta gasto di personal, den un forma asina iresponsabel.

Ta mesun cos cu e situacion crea awor na AZV caminda sin ningun consulta, sin ningun dialogo y awor ta pueblo ta bay Sali perhudida di henter e situacion crea pa gabinete Wever Croes.

Ningun momento gobierno di Hulanda, manera gobierno di Aruba ta pretende, a bin exigi pa reduci gastonan den AZV pero ta Minister Dabnui Oduber a bin insinua cu gobierno Hulandes kier mira un reduccion di 50 miyon den AZV.

Algo cu ta practicamente dificil di kere ya cu na Hulanda mes despues di e crisis di covid, gobierno a inverti mas ainda den cuido medido pero aki na Aruba un gobierno ta bin hunga grandi y dicidi di sigura Hulanda cu e por spaar 50 miyon den e seguro aki.

Pa colmo tur e medidanan aki ta confirma cu gabinete Wever Croes no tin nocion di loke e ta haciendo, no tin vision pa atende cu e crisis cu e pais  ta enfrentando  ya cu tin leynan cu ta mustra todo lo contrario di loke gobierno ta pretende di haci.

Leynan existente cu ta mustra cu gobierno tin cu para repsonsabel na momento cu AZV no logra di cumpli cu su gastonan na final di aña y tin cu haci esaki pa medio di un subsidio aproba pa parlamento, pues no por bisa sin mas cu awor na luga di duna, ta bay kita placa for di AZV cu na final di dia por bin bati na porta di gobierno pa cubra e deficit cu e lo sufri.

Sinembargo gabinete Wever Croes cu nunca a pone e hende central, cu no a duna pueblo nada di loke el a priminti, ta prefera di elimina e ‘daggeldvergoeding’ pa pashentnan cu ta ricibi tratamento den exterior, creando problema pa hopi di nan.

Tambe e gobierno aki a dicidi di elimina e servicio di transporte di pashentnan di dialyse cu tur consecuencia cu esaki lo trece cune y riba dje awor tur cliente di AZV na momento cu nan bay bishista nan dokter, lo tin cu paga algo como ‘bijdrage’ pa e gastonan di tratamento medico di AZV.

Tur e medidanan aki ta idea- y obranan di gabinete Wever Croes cu Hulanda solamente a bisa, is goed, ta bon,” Parlamentario Benny Sevinger a declara.