Falta dos dia pa nos celebra e Fiesta di San Juan “Dera Gay” cu ta dia 24 di juni. Un di e tradicionnan di mas bieu di nos isla. Lastimamente e aña aki nos no por celebr’e manera di custumber cu baile, musica, canto y weganan.
E fiesta aki ta data for di 1862 y nos ta celebr’e tur aña riba dia 24 di juni. Tin diferente version tocante e origen di e fiesta religioso y cultural aki cu Aruba ta celebra como un fiesta nacional. E origen religioso ta referi na e nacemento di Juan Bautista y e origen cultural ta referi na e fiesta di cosecha.
Como fiesta cultural, dia di San Juan “Dera Gay” ta mas conoci pa su musica, baile, cendemento di candela, cuminda tipico y bebida. Segun e tradicion e fiesta ta cuminsa dia 23 di juni ora cu e cunukeronan ta cende sobra di palo di maishi na candela p’asina cuminsa prepara pa e temporada nobo di cosecha. E cendemento di candela ta e simbolo di purificacion.
Dia 24 di juni, despues di bahada di solo, e fiesta di San Juan “Dera Gay” ta cuminsa den diferente districto cu baile di Dera Gay, baile di bula candela y baile di bandera. E baile di candela ta pa proteccion contra malesa y mala suerte. Tambe tin e baile di bandera, caminda diferente banderin ta wordo poni riba vloer y e bailado cu su wowo bon mara mester piki e banderinnan. E baile mas conoci t’esun di Dera Gay, unda e hende homber cu su wowo mara y c’un palo den su man mester purba mata e gay. Henter e baile ta tuma luga bou tocamento y cantamento di e cantica di San Juan.
Normalmente Departamento di Cultura ta bishita scolnan pa duna informacion y demostracion di e fiesta y e baile y diferente Centronan di Bario ta organisa actividad pa celebra e dia aki y asina mantene un di nos herencia cultural mas bieu bibo.
Mirando e situacion e aña aki nos mester buska otro maneranan pa duna atencion na e fiesta special aki. Como mayor nos por lesa e storia pa nos muchanan, contanan di con antes tabata celebra e fiesta aki na grandi, of nos por den seno familiar haci e baile, canto y weganan. Otro manera ta pa pinta un pintura of traha un obra di arte. Gobierno lo tin un programa special na television riba dia 24 y mas cu claro nos famianan por bini hunto pa wak esaki.
Ban hunto, bou di e circunstancia dificil aki, toch celebra e fiesta di San Juan “Dera Gay” y sigui biba nos cultura y cuida y stima loke ta di nos. Ta keda na cada un di nos pa salvaguardia un di e herencia cultural di mas bieu di nos pais. Dere gay, dere gay….. pa nos mate.
