Riba pregunta di prensa den e conferencia di prensa seminal, Premier Evelyn Wever-Croes a expresa cu e ta haya tur e discusion tocante si Aruba mester bira gemeente di Hulanda, absurdo.
Aruba ta pasando den un crisis hopi grandi y na e momentonan aki lo miho ta pa nos hunto delibera con ta bay saca nos pais di e crisis aki. Acaso bira gemeente ta soluciona e crisis? Acaso si Aruba bira un gemeente ta nifica cu nos ta haya un solucion pa nos problemanan financiero? No! Pasobra e islanan BES tambe tin nan problemanan.
Si e lo tabata un solucion, e ora lo por tabata tin sentido pa esnan cu ta desea di biba den in gemeente, hiba e discusion.
Pero no tin un problema cu Aruba tin awor, cu si nos bira gemeente. Pa Aruba aworaki nos prioridad ta pa habri nos fronteranan bek pa por cuminsa desaroya nos economia. Acaso si nos bira gemeente, nos no mester haci esey?
Es mas, Premier Wever-Croes a reacciona cu Aruba por a “crush the curve” trempan danki na e hecho cu nos NO ta gemeente pasobra nos por a aplica nos propio strategia agresivo di test, algo cu ni Hulanda ni islanan BES a haci.
“Imagina bo si nos no a haci esaki. Pues hustamente e crisis a demostra nos cu e hecho cu nos ta autonomo, a yuda nos un biaha mas.
Laga nos keda enfoca riba e retonan real di nos pais na e momentonan aki y traha riba solucion y union, y no mas division, tabata declaracion di Premier Evelyn Wever-Croes.