Dia 15 di juni Gobierno di Aruba mester presenta un plan di reforma, como tambe di reduccion di gasto, pa asina por bin na remarca pa e siguiente tranche di financiamento. Na luna di maart Gobierno a presenta un presupuesto cu un deficit di 1.3 biyon florin, di cual Hulanda a financia 100 miyon florin so te awor; Gobierno di su banda lo a corta un total 85 miyon di florin riba gasto di trahado y den cuido medico. Pues ainda tin sigur mas di un biyon florin cu mester wordo cubri y esaki lo ta mara na condicionan hopi estricto y hopi severo, segun por a compronde. Loke cu Gobierno propone lo ta tambe e condicionnan pa por ricibi sosten financiero pa gastonan di Gobierno y e subsidio di salario pa e siguiente luna.
Parlamentario Arends a bisa cu Gobierno a informa PArlamento despues di a compromente su mes di corta 85 miyon di florin pa bin na remarke pa e di dos tranche di financiamento. E recortenan aki tabata consisti di reduccion di salario di ambtenaar, reduccion di bonus di fin di aña di pensionadonan di APFA, como tambe den ciudao medico. Sinembargo e gastonan operacional di gobierno, a baha cusolamente 9 miyon florin, despues cu e gastonan a subi cu 165 miyon florin for di 2017.
Aunke cu Gobierno di Aruba tabatin oportunidad di bin Parlamento prome di presenta e siguiente fase di condicionan y discusti esakinan cu parlamento prome di a drenta den e negociacionnan cu Hulanda, a opta sinembargo pa no duna ningun informacion riba e reformanan cu ta na caminda ni tampoco e recortenan cu ta na caminda pa asina nan por bin na remarca pa e di tres trans y asina compromete Aruba. “No ta cuestion cu Hulanda ta ‘impone’, pero ta Gobierno di Aruba ta propone y den tur esaki Parlamento di Aruba ta wordo poni totalmente un banda. Lo bay tin un entidad Hulandes cu lo atende cu esaki, pero te ainda no tin claridad kico esaki ta, si esaki lo bay ta un forma di un banco of si e ta bay ta un agencia na Hulanda. Gobierno no por a duna informacion riba esaki.”
Mientras cu ta corta substancialmente den empleadonan di Gobierno y cuido medico, gastonan di abogado y di oficina ta keda practicamente intacto.Ta algo sumamente lamentabel y nos por a tuma nota den medionan di comunicacion cu AZV ya caba lo elimina transporte pa personanan cu mester haya dialysis pa motibo cu gobierno a dicidi di corta gasto di operacion di AZV cu 5 miyon florin pa luna. Ta hopi cuestionabel cu primeramente gobierno ta bay corta cerca e empleado publico, ta bay corta den asistencia y cuido medico, mientras cu den e gastonan di operacion mes, gobierno ta kita masha poco mes,” Parlamentario Richrd Arends a finalisa bisando.