Scopapelstraat Tarabana – Diaranson mainta trempan polis a wordo avisa di un caso di atraco. Esaki a tuma luga na un cas situa den Scopapelstraat na Tarabana.
Polis a compronde cu lo ta trata di dos hende homber, amboa ta blanco. Nan lo a bandona e adres na Scopapelstraat den un Nissan March (RHD). Prome informacionnan tawata bisa cu nan lo a wordo baha den caya Sint Vincent cu ta un zijweg di Grenedaweg.
Segun informacion haya na Scopapelstraat y tambe imagennan di video, por a saca afo cu uno tin un arma di candela y e otro un cuchiu.Team di aresto a presenta den Grenedaweg y a sinta warda e momento indica pa haci nan entreda.
Tawata trata di un compleho di apartamento color blanco na final di e caya. Enberdad tawata tin hende den e luga y te hasta mucha, pero lamentablemente e personanan busca mes no a wordo haya.
Un team di Ministerio Publico encabesa pa Huez Comisario tambe a yega na e sitio y despues a cana bay unda Team di Aresto a kibra drenta. Slachtofferhulp y BFTO(departamento tecnico) tambe a presenta.
For di Cuerpo Policial nos a ricibi e siguiente informacion:
“Awe pa 06.50 central di polis ta wordo notifica cu un atraco a tuma lugar na un cas na Scopapelstraat. Na yegada di e prome patruya por a bin compronde cu 2 hende homber habla spaño un cu un arma di candela y e otro cu un arma blanco lo a drenta e cas, mara dos habitante y bay cu un suma di 1700 florin. E atracadonan a huy for di e sitio den un Nissan March color oranje. E number di auto ta conosi pa Atraco Team. Atraco Team , polis técnico y slachtofferhulp a presenta na e sitio di e sucedido. Cuerpo Policial ta haci un peticion es cu a wak algo of sa algo jama e tiplijn di polis cu ta 11141. Bo anonimidad ta wordo garantisa”.
