Oranjestad – Durante conferencia di prensa Minister di Finansa a duna pueblo di Aruba un relato di e efecto financiero y economico di COVID19 na Pais Aruba, cu recientemente a wordo presenta na miembronan di Parlamento.
Entrada di Pais Aruba ta baha drasticamente
Pa locual ta trata e entrada di Impuesto, Minister Maduro ta haci un comparacion di luna di april 2020 cu luna di april 2019 y ta informa cu entradanan di Impuesto Directo ta baha cu 26.3% y Impuesto Indirecto ta baha cu 46.4%. Pa locual ta Impuesto di Importacion y Accijns, esaki ta baha cu 62.3% comparando cifranan di luna di mei 2020 cu mei 2019. Importacion tambe ta cay grandemente. Por lo general importacion a baha cu 45%, importacion di cuminda a baha cu 38% y importacion di otro productonan a baha cu 47%. E mandatario ta subraya cu e cifranan di luna di april ta refleha e actividadnan economico di mitar di luna di maart na unda cu ainda tabata tin actividad economico ya cu ainda tabatin turista y negoshinan tabata habri. Asina mes e cifranan ta mustra un bahada grandi.
Entrada pa mantene e sistema di seguridad social tambe ta baha
E mandatario ta informa cu e entradanan di e sistema di seguridad social tambe ta conoce un bahada. Si compara e cifranan di luna di april 2020 cu luna di april 2019 por constata cu entrada di BAZV ta baha cu 40.8%, Prima di AZV ta baha cu 22.9% y Prima di SVB ta baha cu 22.7%. Tur ingreso pa e primanan social a cay drasticamente door cu e negoshinan a cera. Minister Maduro ta subraya cu Gobierno a bin ta trahando pa cuida e fondonan di AZV y SVB pa asina e grandinan por sigui ricibi nan pensioen y tambe pa esnan cu bira malo por sigui haya e asistencia necesario. E dignatario ta informa cu SVB tin un reserva pa 3 luna y pa e motibo aki tin urgencia pa por haya e fondonan necesario pa por yuda cu e likides di SVB.
Fondonan pa brinda alivio
E fondonan cu Pais Aruba ta ricibi di Reino Hulandes ta pa yuda AZV, SVB, cubri gastonan di gobernacion y pago di Subsidio di Salario. Gobierno mester corta den su Presupuesto pa asina por haya e fondonan necesario pa brinda na e personanan cu a perde trabou via di F.A.S.E. y pa brinda e sosten financiero di Afl. 4000 pa kwartaal na e negoshinan chikito y mediano.
COVID-19 ta manera un horcan
Minister Maduro ta ilustra cu COVID-19 ta manera un horcan. Aworaki Pais Aruba ta den e wowo di e horcan, nos a domina e parti di salubridad, pero awo e rabo ta bay bin cu e consecuensia financiero y economico pa nos Pais. E mandatario ta subraya cu ta solamente cu esfuerso y den union nos por hiba Pais Aruba dilanti. Minister Maduro ta enfatisa cu pueblo di Aruba por ta sigur cu Gabinete Wever-Croes lo continua trahando serio, na un manera responsabel, diligente, cu tino y curason na bienestar di nos Pais Aruba.
