Melvin Tromp di AVP: Gobierno ta ehecutando Fase pero sin control perhudicando hopi

Tin un situacion den henter e proceso di Fase cu gobierno a bin ta ehecutando cu ta subsidio salarial pa esunnan cu a perde nan trabou pero tur cos ta mustra cu pa falta di un miho ehecucion y miho control, tin miles di trahado cu ta wordo perhudica den e proceso aki.
Melvin Tromp di partido AVP ta mustra cu kehonan cu ta drenta riba e ehecucion di Fase aki, ta sigui confirma cu tin hopi hende cu a perde trabou y no tin ningun entrada pa asina alivia e situacion den nan cas.
“No solamente tin informacion ta drenta cerca nos tur dia pero tin noticianan cu ta duna un indicacion cu tin cierto cosnan cu no ta canando bon manera entre otro e Director di SvB, sr Jacobs, ta confirma e siman aki den medionan di comunicacion, cu 5935 persona a bin na reamarca pa haya e suma di 950 florin di e proyecto di Fase.
Ora cu nos a scucha Minister di Finansa papia siman pasa el a papia di un cifra mucho mas halto cu lo a ricibi e subsidio aki di e proyecto Fase y gobierno di Hulanda a bay di acuerdo pa yuda financia e subsidio pa loke Minister a menciona na inicio di e pandemia, pa entre 37 pa 38 mil trahado cu lo a perde nan trabou.
Henter e proceso aki no ta mucho cla, caminda tin trahadonan cu a entrega tur informacion cu ta rekeri, tin cu nan nomber a bin riba un lisa caminda nan ta haa un codigo y number y a base di esakinan nan por haya sa cu e placa lo mester bay riba nan cuenta bancario.
Sinembargo tin hende cu nan nomber a wordo publica riba e lista aki pero nunca a ricibi e suma di 950 florin pero ta dificil pa nan haya claridad riba esaki, ya cu tin hopi hende cu ta confrontando mesun problema.
Pues hopi hende ta riba e lista pero e placa no ta bay riba nan cuenta y ta dificil nan haya ayudo riba termino corto mirando e cantidad di hende cu ta sperando riba e ayudo aki.
Loke ainda ta hopi serio ta cu tin casonan caminda e dunadonan di trabou lo a ricibi e suma di subsidio salarial for di Fase pa nan trahadonan pero cu no a pasa esaki pa tur nan trahadonan, caminda tin hopi discusion tmando luga riba e status real di un of otro trahado.
Loke nos por a compronde tambe ta cu no ta tur hende a haya e suma di 950 caminda den algun caso a kita algo di e suma aki sin cu tin indicacion unda e placa aki ta bay of kico a wordo haci cne.
Tur e situacion aki ta bolbe confirma cu gobierno no tin control di e situacion aki, no tin un plan fiho y concreto caminda esunnan cu a perde nan trabou, por acudi un caminda y nan problemanan wordo atendi y soluciona.
Ta hendenan cu realmente tin mester di e placa aki, sigur despues cu nan a perde tur nan salario ora cu gobierno a decreta e lockdown na luna di maart ultimo y ta algo sin duda hopi amargo ya cu gobierno mes a anuncia cu el a ricibi ayudo financiero den forma di prestamo pa atende cu e miles di hende cu a perde nan trabou.
Ta di spera cu gobierno atende cu e situacion aki y trece claridad den henter e situacion aki y asina alivia e problemanan serio cu varios famia ta pasando aden pa algun tempo caba,” Melvin Tromp di AVP a declara.