Oranjestad – Raad van Advies a publica su relato di aña 2019 riba 1 di april. E añanan anterior tawata haci entrega di e relato anual personalmente na Gobernador y na Prome Ministro door di e Presidente y Secretario di Raad van Advies. E aña aki, pa motibo di e COVID-19 crisis, a dicidi pa un enfoke diferente. E relato anual ta accesibel desde awe riba e website di Raad van Advies, cual ta completamente renoba.
Relato Anual
Manera custumber e relato anual no ta contene solamente un bista di e trabounan haci durante e aña, sino tambe un bista critico riba e desaroyonan durante dicho aña.
Presidente di Raad van Advies den e introduccion (januari 2020) ta expresa e necesidad pa e Ombudsman, e reforma fiscal, un inventarisacion structural di e trabounan di pais Aruba y e Landsverordening di Raad van Advies 2020 nobo (un proceso cu a cuminsa na aña 2007) por bira un realidad e aña aki.
E tema di e relato anual ‘Integriteit en Democratische Volwassenheid; op de drempel van het derde decennium’ ta pone nos wak bek riba e decada cu ta tras di lomba y tambe riba loke tin nos dilanti. Como un pais hoben na caminda pa un democracia madura, e ta un bon momento pa para keto un rato, pa fiha nos posicion y kisas ahusta nos rumbo. Raad van Advies ta spera cu e tema di e relato anual lo por contribui na e formashon di un pensamento pa un posibel cambio di direccion.
Potretnan di e relato anual
Pa e relato anual Raad van Advies a scohe e biaha aki pa ilustra e bunita pinturanan mural y tambe otro expresionnan di arte cu por admira den curason di e cayanan principal di San Nicolas. Raad van Advies ta apoya e deseo di gobierno pa apunta San Nicolas como e capital cultural; un bunita manera pa enfatisa e interes di e historia cultural di San Nicolas.
Imagen nobo y website renoba
Anticipando e Landsverordening Raad van Advies 2020, entrante 1 di januari 2020 Conseho a introduci un imagen (huisstijl) nobo como tambe nan website cu nan a laga renoba recientemente. A scohe pa un diseño cu ta visualiza e aspiracion di Raad van Advies cu den su consehonan ta enfoca riba e aspecto y balornan cu ta caracterisa Raad van Advies, esta integridad y confiabilidad.
COVID-19 crisis
Desde cu a finalisa e relato anual den luna di januari 2020, Aruba ta confronta cu un crisis social economico grave a consecuencia di e pandemia COVID-19. Pa sostene e proceso pa mas lihe posibel reanunda e economia y limita e daño social, Raad van Advies a tuma e decision pa bolbe presenta su recomendacionnan haci anteriormente pa tin un modelo social economico dinamico y duradero. A haci esaki den forma di consehonan di propio iniciativa (articulo 17, onderdeel a, di e Landsverordening Raad van Advies).
En total Raad van Advies lo duna 4 conseho separa cual ta concerni: e reforma fiscal, cuido medico, aparato gubernamental y clima empresarial como tambe seguridad social. Despues di entrega e consehonan na Gobierno, lo publica esaki riba e website di Raad van Advies. (E prome 2 consehonan ya ta riba e website).
Esnan cu ta desea di sa mas tocante e tema menciona, e trabounan di Raad van Advies den aña 2019 y ta desea di wak e potretnan unico, por bishita e website: www.rva.aw.