Parlamentario Alan Howell (POR) durante reunion riba Enseñansa: “Nos estudiantenan no mag di wordo perhudica”

Parlamentario Alan Howell durante e reunion publico riba enseñansa a atende cu diferente temanan di relevancia.
El a bisa cu enseñansa tambe a sufri bou di e crisis di Covid-19 y su preocupacion grandi ta cu ora e virus aki a yega Aruba, nos scolnan mester a cera. Nos no tabata prepara pa enseñansa online, por a mira cu no solamente e masestronan tabatin dificultad cune, pero specialmente nos estudiantenan a wordo perhudica. A pesar di e situacion aki por a mira e bon resultadonan cu e diferente scolnan a logra den e porcentahe di studiantenan cu a slaag pa cual studiante, maestro y mayornan merece palabranan di pabien.
Howell ta sigui splica cu e efecto di Covid-19 no por perhudica e studiantenan y den e cuadro aki un estudio haci pa Departamento di Enseñansa ta mustra cu 51% di e muchanan no por a volg e lesnan online na un manera optimal, ademas, 90% di e maestronan a bisa cu a haya complicacion pa por a duna les online debi cu no tabatin preparacion adecuado pa haci esaki, inclusive algun di nan a indica cu no tabatin e material necesario.
Pa tal motibo Alan Howell a presenta e mocion den cual ta urgi gobierno pa flexibilisa e bevorderingsnormen pa scolnan basico y avansa pa asina evita cu nos studiantenan sali perhudica mirando cu e situacion actual ta fuera di alcance di scolnan, maestronan y studiantenan y ta imposibel pa evalua e studiantenan optimalmente.
Terminando su disertacion, parlamentario di POR a realisa un serie di pregunta na Minister di Enseñansa:
Cuanto maestro ta pro pa Colegio Arubano San Nicolas bay bou de Schakel?
Cuanto maestro ta pro paAbraham de Veer y Pieterboer bay bou SPCOA?
Con ta posibel cu un scol cu ta cay bou di un fundacion ta keda cu caracter di un scol si gobierno no tin zeggenschap mas eyden?
Cua ta e posilibilidad pa Colegio Arubano San Nicolas bay den conhunto cu De Schakel en bes cu e ta cay bou di dje?
Resultadonan di Colegio Arubano San Nicolas (68%) y Abraham de Veer (89%) di e aña escolar aki no ta refleha cu e scolnan merece respet pa keda den nan forma actual?
Cua ta e posibilidad pa adapta e criterionan pa Colegio Arubano San Nicolas y Abraham de Veer keda existi como DPS mirando cu segun minister pa motibo cu e klasnan ta bira menos e scolnan no ta cumpli cu e criterionan pa nan keda existi?
Cua ta e posiblidad pa pone e cambionan presenta ‘on hold’ pa por splica esakinan na tur stakeholdernan y haya nan input riba esakinan?
Cuanto di e muchanan cu ta bay Abraham de Veer y Pieterboer ta di religion protestante?