Parlamentario Arthur Dowers Nada di gobierno di MEP mester sorprende Booshi Wever

Na momento cu scucha e politico cu a wordo crea y forma pa partido MEP, esta Booshi Wever trata di hunga wega politico cu e decision di Parlamento pa entrega 25% di salario, e ta bolbe mustra cu apesar cu e no ta cu MEP mas, Booshi ta keda cu e mentalidad di MEP.
“Awor Booshi ta papia di ‘wake up call’ cu ta momento pa rediseña e rumbo di nos pais lubidando cu su persona mes a lucha contra un proceso asina ora cu gobierno di AVP a dicidi di trece cambio den e ley di edad di pensioen pa gobernante- y parlamentarionan.
Ta Booshi hunto cu su lider e tempo ey den mal forma a ataca y expulsa dos miembro femenino di partido MEP pa motibo cu nan a sostene e cambio di ley aki pero awor ta pretende cu e kier mira un cambio.
Booshi ta pidi pa mara man di politiconan pero no ta su persona tabata comete fechorianan politico ora cu e tabata Minister di gobierno di MEP, a sinta scucha transmision di baseball riba custia di pueblo, a bin cu proyectonan dudoso cu te ainda ainda pueblo di Aruba ta pagado pa esakinan sin saca beneficio di esaki?
Pa falta di curashi di ataca e fraccionnan cu ta sostene gobierno, Booshi ta haya ta necesario di hinca un decision di fraccion di AVP den duda, caminda nos a presenta un amienda pa un reduccion di salario di 25% compara cu 20% cu gobierno di MEP, su partido MEP, a dicidi di lo implementa pa e ministernan.
Den momentonan asina dificil fraccion di AVP no tin tempo pa hunga politica barata manera Booshi kier laga pasa di ta haciendo na e momentonan aki, ya cu tempo cu gobierno di MEP a introduci e famoso BBO, Booshi tabata Minister y a permiti esaki pasa bay hincando pueblo den un situacion financiero hopi delicado.
No bin papia awo como si fuera bo no tabata parti di e desaster cu gobierno di Nelson Oduber a laga e pais aki aden na 2009, caminda fondo di pensioen tabata na rand di bancarota, mesun cos cu SVb y AZV ya cu como minister Booshi por a lanta para pa pueblo y evita cantidad di cos cu no mester a tuma luga perhudicando pueblo.
Cuanto Booshi a yega di entrega for di su salario den e periodo cu nan a pidi trahadonan di gobierno pa laga nan vakantie uitkering cay, pa laga indexering cay y otro beneficionan ya cu ta su Booshi su gobierno a kita for di trahadonan mientras cu su persona y su coleganan minister e tempo ey, no a entrega ningun cen preto,” Parlamentario Arthur Dowers a declara.