Home Politics Parlamentario Alan Howell 25% ta loke mi a propone for di ‘day...

Parlamentario Alan Howell 25% ta loke mi a propone for di ‘day one’ y awe e ta un realidad aproba unanimamente

SHARE

Parlamentario Alan Howell a comenta riba e resultado final di e reunion publico pa loke ta trata e presupuesto di Parlamento.
El a indica cu esaki a dura mas largo cu loke tabata planea. Howell a presidi e reunion aki mirando cu Presidente di Parlamento ta alaves presidente di e comision di Asuntonan Interno di Parlamento y como tal no por presidi e reunion publico.
Alan mester a schors e reunion na prome instante pasobra Gobierno a manda un carta cu tabatin di haber cu e tratamento cu nan tabata atendiendo y e kier a duna e parlamentarionan e oportunidad di pasa riba dje y pa por a scucha for di Comision di Asuntonan Interno kico nan ta pensa riba e carta.
Igualmente el a comenta cu tabatin un diferencia di opinion entre lider di fraccionnan riba con e amienda ta wordo traduci huridicamente. Howell a indica si cu e discusion cu tabatin tabata uno sano, intercambio di opinion entre e diferente lider di fraccionnan y cu comprension mutuo. Mirando cu e cambio aki riba salario tin consecuencianan legal y mester ta den cuadro di ley a busca expertonan financiero rond di 5or di atardi. Despues di a haya splicacion for di nan, Alan Howell a continua cu e reunion pa 7or di anochi.
Ora e reunion a continua, a bin dilanti como un solo team den un union grandi den Parlamento y a presenta un amienda en conhunto, cual a wordo presenta pa Sr. Dowers den nomber di tur parlamentario. Es decir, e amienda no ta pertenece na un of otro fraccion, pero di tur fraccion den Parlamento. E amienda ta encera un reduccion di 25% di salario di parlamentarionan for di mei te cu december, inclusive e vakantieuitkering cu a wordo kita completammente. Pero tur parlamentario a expresa si cu si mester corta mas pa ta solidario cu ciudadanonan, nan ta dispuesto pa haci esaki. Adicionalmente, presupuesto di Parlamento tambe a wordo reduci cu aproximadamente 500 mil Florin cual tambe lo ta dirigi pa yuda den e situacion di crisis den cual nos ta na e momentonan aki.
Na momento cu a bay over na votacion pa loke ta trata e amienda y e ley, tur dos a pasa unanimamente cu 20 voto na fabor y 0 contra.
Alan Howell a bisa cu e ta hopi contento con e reunion di siman pasa a bay, den cual a sobresali e union y cu un nivel halto. “Nos mester ta ehempel, nos mester duna e ciudadanonan e sentimento cu tin representantenan di pueblo cu no solamente tin e crisis cu nos ta pasando aden den serio, pero nos pais mes tambe. Manera ma boga for di cuminsamento, mi ta kere cu e 25% ta unda nos mester ta y mi ta contento cu e reunion a termina tambe aprobando e 25% unanimamente”.
Finalisando el a recorda loke semper e ta bisa, cu sim ester corta, nos mester cuminsa corta na e grandinan, nos no por corta na e chikitonan prome. E grandinan mester duna e ehempel y or abo cuminsa na e grandinan e ora ey por bay na esnan chikito, mustrando cu ta solidario cu nan.