Den cualkier careda di cabay bo tin ehemplarnan cu ta faborito pa gana un careda, pero tambe bo tin e asina yama “batacazonan” cu tey djis pa tey y tin biaha di chiripa ta gana un careda! Hopi biaha nan ta resalta den un grupo di perderdor. Pero manera tin un dicho ta bisa: “tanten cu nochi no cera, careda di bina no a caba”! Y obviamente e articulo di UPP a stroba e fiestamento cu e supuesto logro di e batacazo di AVP den Parlamento, esta Dowers, cu e 25% di corte di salario. Algo cu pa mi ya tabata previsto cu lo bay pasa mirando con e parlamentarionan, esnan cu y otronan sin experiencia tabata bin ta trata e topico salarial y e crisis di COVID-19.
Pues e supuesto exito y triunfo aki di AVP y Dowers ta wordo laga na filingrana cu loke UPP a trece dilanti. Un biaha mas ta wordo demonstra cu enbes di keda riba e issue e batacazo Dowers kier desvia atencion mustrando asuntonan cu no ta kita nada di loke UPP a trece padilanti. Cada un punto cu ela trece dilanti nos lo por refuta, un pa un, pero no ta bale la pena. Loke si ta resalta ta e hecho cu e NO ta nenga cu con bai bin e proposicionnan cu a ser treci den Parlamento ta actonan di populismo!!
Loke cu UPP no ta compronde dicon no ta reacciona “zakelijk” riba e berdadero pasonan cu mester ser tuma pa trece un solucion duradero, structural y realisabel!
Y nos kier djis mustra riba kico lo por tabata e situacion si e reglanan estricto di “Good Governance” tabata “in place” caba. Cu e reglanan aki vigente kizas e batacazo Dowers lo no tabata tin e minimo chance pa competi mes, corda pa gana e corona pa ta e politico mas Populista!
Djis un paar di ehempel: si reglanan di Good Governance tabata vigente, un ATA-bank lo no tabata tey, na unda miyones a bai pa e ex-colega di e batacazo Dowers, algo cu por cierto e mesun Dowers a declara publicamente. Asina tambe lo e casi un BIYON di HOH lo NO tabata posibel, hincando asina nos pais den un debacle financiero.
Si a bai di acuerdo cu e mocion di mi na 2012 pa pone den e ley di comptabilidad cu pa desvia di cualkier destaho mester di un LB enbez di un MB, awe hopi otorgamento di contractonan lucrativo pa sponsornan y amigonan lo no por a tuma lugar (renobacionnan di scol, incinerator chikito etc etc.). Tambe e gesto di parlamentario di RED, Ricardo Croes, pa loke ta su mocion, cu AVP no a vota voor, lo no tabata necesario, ya cu e cambio proponi lo ensera cu na momento hasta di destaho bou man, Parlamento mester wordo envolvi debidamente y cu Gobernador tambe lo tabata un posicion mas clave, prome cu patronahe politico tuma lugar. Den e solucion aki, lo no stroba tampoco pa esnan ayega na un gobierno, por participa debidamente, sin ta wordo previlegia.
Si a bai di acuerdo cu un otro mocion cu e “schuldquote ” no por surpasa 45% y e deficit no por surpasa 3%, awe Caft lo NO tabata tey mes. Pero tanto fraccionnan di AVP y MEP a vota contra na 3 ocacion.
Si esakinan tabata “in place” awe sigur e yudanza for di Hulanda lo a bay mas facil, debi na e confianza cu nan tin den nos sistema y den nos mandatarionan.
Ta pesey un pregunta so mi kier a haci na e batacazo Dowers, ki dia bo ta presenta un ley initiativo cu ta encera introduccion di TUR e leynan pa percura cu Aruba lo wordo goberna drechi? Leynan entre otro riba financiamento di partidonan. Ley di ombudsman y “klokkenluiders”. Ley di screening di politiconan, cu by the way na 2017 e batacazo Dowers, no a percura pa para ora cu bay regla e posicion di colega di partido y di gobierno Paul Croes. Y tanten cu e leynan aki no bini, Aruba y e ARUBIANO lo keda ser ta e victima y cu na final lo paga e cuenta, manera pueblo ta pagando pe awor.
Esakinan ta djis 3 puntonan pa nos ilustra cu si nos deficit real no mag surpasa 3% y nos “schuldquote” tabata na 45%, awe facilmente kizas nos por tabata tin un “buffer”, “traha dam warda awa”, pa nos por a surpasa e retonan cu nos tin awor cu e crisis aki. Y si esey no lo tabata e caso mes, nos lo por a haya un prestamo facilmente na un porcentahe hopi abou of kizas hasta “schenking” di Hulanda.