Dialuna Gobierno a duna permiso pa varios negoshi habri y asina cuminsa poco poco cu nan actividadnan commercial, pero teniendo semper na cuenta cu e medidanan preventivo pa cu COVID-19.
Den oranan di mainta camindanan a cuminsa bira hopi druk, rotondenan e trafico tabata pega poco, despues di mas di un luna e centro di cuidad cu tabata morto, Dialuna mainta a cuminsa haya manera un bida bek.
For di trempan por a mira na e lugarnan di transferencia di placa , MFAnan, banconan, compania di utilidad, Setar etc cu filanan enorme di hendenan cu ta para, te hasta den rolstoel y den solo pa cumpli cu nan debernan di paga awa, coriente y telefon etc. Na Aruba hendenan tin manera un temor di keda sin paga pa nan no corta nan coriente, awa of telefon, pasobra semper nos pueblo ta wordo indirectamente menasa cu si bo no paga na tempo nan ta desconnecta. Mester bisa si cu asina mes e companianan ta mustrando compression pa esnan cu a perde nan entrada y cu no por paga na tempo.
Tambe oficinanan tabata tin mas trahador cu den e ultimo simannan aki. Varios tiendanan di paña, sapato etc tambe a habri pa mira si por si por logra haya poco entrada pa sobrevivi e temporada dificil aki.
Nos mester gradici e crisis team cu for di comienso a instrui henter Aruba hopi bon, kiko mester haci of con nos mester protega nos mes. E frase di mester laba man bon cada pa 20 seconde of uza handsanitizer. Tambe cu nos mester tene distancia di otro, no por brasa, ni cuminda otro cu sunchi, ya caba a bira custumber den nos bida diario y sigur esaki lo ta bay ta por lo pronto parti di nos Normal Nobo.
Mester bisa cu Aruba hopi liher tabata tin e Coronavirus controla, pero si nos no por bira non chalant of bay bek awo ki mesora na e Aruba prome cu Covid-19.
Aruba a cuminsa un etapa nobo, cu sigur no lo ta bay ta facil pa tur hende, cu reglanan cu tur hende mundialmente mester sigui den e Normal Nobo. Mientras cu no tin un vacuna of cura pa e Covid-19 nos tur ta core riesgo di wordo infecta. Pesey mes pa habri comercio bek, pa hendenan por sigui traha y pa placa ta den circulacion. Nos tur hunto mester bay biba adaptando nos bida na e reglanan di e Normal Nobo.
