Conseho di Minister di Reino diabierna 1 di mei a trata e peticion di Gobierno di Aruba pa haya un fiansa pa por yuda dunado di trabou mantene trahado na trabou. Gobierno di Aruba ta hopi agradicido pa e fiansa aki, cu ta un zachte lening.
E suma di e fiansa ta 49.4 miyon florin y ta sin interes, mescos cu e prome fiansa. E ta un asina yama “bullet-lening”, cu mester wordo paga bek despues di dos aña y na e momento ey por refinancia.
E fiansa aki ta destina pa Gobierno yuda dunado di trabou cu un subsidio pa e por sigui paga e salario di e trahado. Talves e dunado di trabou no por paga e salario completo, pero en todo caso e subsidio aki por yuda pa gran parti di e salario wordo paga.
E crisis di corona a afecta Aruba su economia severamente y hopi compania ta confrontando problemanan serio. Den esaki 37 mil trahado ta core riesgo di perde entrada of hasta perde trabou. Gobierno di Aruba su meta ta pa purba mas tanto posibel mantene trahadonan na trabou, pero ta compronde cu pa hopi dunado di trabou esaki ta bira hopi dificil. P’esey a haci e peticion pa e fiansa aki na Gobierno di Reino y e bon noticia a wordo duna diabierna cu Conseho di Minister di Reino a aproba e plan y vision di Gabinete Wever-Croes.
Esaki sigur ta un bunita regalo pa trahadonan riba dia di obrero y mes momento e ta demostra confiansa den Gobierno di Aruba cu poco poco pero sigur ta guiando nos pais a traves di e peor crisis cu nos pais a conoce.
“Mi ta gradici tur esnan cu a demostra confiansa den nos plan, nos guia y nos vision. Mi ta gradici tambe tur esnan cu a mustra solidaridad y aporte den entrega di salario den sector publico, fundacionnan cu ta wordo subsidia pa Gobierno y empresanan estatal. Mi kier gradici tambe tur colega Minister pa e trabou duro di por yega asina leu, specialmente Minister di Finansa Xiomara Maduro pa a logra e fiansa aki, Minister di Labor Glenbert Croes cu ta lucha pa e clase trahado y Minister Plenipotenciario na Hulanda Guillfred Besaril, staf di Arubahuis pa tur e trabou na Hulanda pa por logra esaki. Hunto nos a logra e di dos ‘zachte lening”, tabata palabranan di Minister President Evelyn Wever-Croes.