Minister Glenbert Croes durante di Rueda di Prensa a elabora riba e situacion cu nos hendenan ta bibando. Un situacion cu ta exigi sacrificio di nos tur bibando riba e baranca aki, pa hunto nos yuda otro mantene cabes riba awa. Manera e mandatario a expresa, Gobierno ta trahando duro den esfuerso conhunto pa logra pa nos tur sobrevivi e etapa dificil aki, un experiencia doloroso pa hopi famia aki na Aruba cu di un dia pa otro a lanta sin trabou, sin entrada, otronan afecta pa e virus, luchando pa nan salud, cuidando su famia. Nos frontliners exponiendo nan mes na tur peliger di e virus pa cuida otro. Nos cuerpo policial cu trabounan dificil pa siguridad di nos tur. Pues tur hende directo of indirecto a wordo afecta pa e crisis aki cu ningun hende por a biba pensa cu lo por destrui mundo den tan corto tempo.
P’esey manera cu diabierna 13 di maart Aruba a constata dos victima di COVID, ya pa 19 di maart a anuncia introduccion di FASE pa brinda e ‘trankilidad’ na tur hende cu “nos lo percura pa hunto por pone pan riba mesa pa boso mes y boso criaturanan”, e mandatario a expresa.
“Hunto so nos por vence e fenomeno dificil aki. No tin duda cu esaki ta un momento di prueba pa nos tur. Nos tur hunto ta bibando un di e pruebanan di mas grandi cu humanidad ta pasando. E pregunta ta ki les nos ta bay saca di dje. Aruba ta pasando door di un renacer. Aruba ta naciendo di nobo.
1 di januari 1986 pais Aruba a nace. E tabata un parto doloroso. Sacrificio cu tur hende a haci, pa Aruba por a nace como pais. Awor nos ta pidiendo den e renacer di e Aruba aki, e nacimento di nobo di Aruba, nos ta pidiendo atrobe sacrificio di nos tur, pa den e renacer aki, e Aruba nobo por bay brinda nos cada un como ser humano, como hende, como profesional, como trahado, como tata, como mama, como yiu un bida nobo. Nos no por bay bek na normalidad. Si nos djis bay bek na manera cos tabata, nos no a siña nos les. Laga e renacer di e Aruba nobo aki, trece e bida nobo cu realmente lo duna un proposito nobo na bida di cada ciudadano cu ta biba riba nos dushi isla cu yama Aruba”, tabata palabranan di Minister Glenbert Croes.