Premier Evelyn Wever-Croes a duna di conoce dialuna cu awor cu e crisis di salud ta mustra di ta domina ta cuminsa e fase di recuperacion economico. Pa esaki el’a presenta un structura amplio cu lo encarga di tur e trabounan na caminda pa recuperacion economico.
Premier Wever-Croes a institui un stuurgroep cu lo guia e proceso y e diferente comisionnan special cu a wordo institui. E stuurgroep ta consisti di personanan di sector priva y semi-gubernamental y ta raporta directamente na Premier Wever-Croes.
Tin tambe un ‘think tank’ consistiendo di varios persona prominente den comunidad, entre nan e ex gobernadornan di pais Aruba, pa duna conseho y guia na e stuurgroep.
Bou di e stuurgroep tin, te awor, 3 comision activo.
IMEDIATO: STABILISACION Y ESTIMULO
Den e comision aki ta tratando di brinda asistencia inmediato na companianan, pa asina companianan mantene trahado den servicio door di duna e doño di trabou un subsidio di salario. Pa esnan cu asina mes perde trabou, tin un asistencia financiero temporal, den e proyecto di FASE. E proyecto FASE a wordo anuncia ya 3 siman pasa, despues di un siman cu e crisis a cuminsa y tin mas di 10 mil persona cu a registra caba pa e asistencia aki. No ta tur a entrega tur documento, pero ta ser spera cu 3000 pa 4000 persona lo ricibi e asistencia financiero e siman aki.
TERMINO CORTO: FAST TRACK
Den e comision aki lo prepara e proyectonan cu ya caba tabata den fase basta avansa prome cu e crisis a cuminsa y cu despues cu shelter-in-place wordo finalisa, por start sali cu e proyectonan. Ta trata di inversionnan priva y publico, cu ta genera cupo di trabou pa esnan cu a perde trabou, y cu lo atrae devisas pa fortifica e balor di nos florin.
TERMINO MEDIANO Y LARGO: INNOVACION Y DURABILIDAD
Den e comision aki lo delinea e modelo economico nobo pa Aruba. Turismo lo sigui ta un pilar economico importante ora ta safe pa nos habri frontera bek, pero nos no por keda conta riba turismo so. P’esey e comision aki lo prepara plannan pa un modelo economico nobo, duradero y fuerte, basa riba innovacion.
Cada comision ta consisti di entre 5 pa 10 persona y lo institui taskforce riba temanan specifico. Por ehempel, e comision special di Fast Track lo tin un task force cu lo dedica na elimina e burocracia “red tape” inecesario den Gobierno. E comision especial di innovacion y durabilidad lo tin task force dedica na sectornan economico prometedor, turismo, economia circular, food security, future of work, enseñansa, pa nombra algun.
E interes den comunidad ta grandi pa yuda den e proceso aki y Premier Wever-Croes ta anticipa cu lo tin como 100 persona envolvi y tur a base gratuito, cual ta sigur di aplaudi.
“Mi tin tur confiansa cu e diferente comisionnan den e structura aki, lo sa di lanta nos economia bek y mas fuerte y resiliente cu antes.’, Premier Evelyn Wever-Croes a expresa.