Home Politics Ex Prome Minister Nelson Oduber: “Con ta para cu nos educacion y...

Ex Prome Minister Nelson Oduber: “Con ta para cu nos educacion y enseñansa despues di Corona Virus?”

SHARE

Cu tur cos lo cambia ta obvio pa nos tur y nada cu nos tabata custuma haci lo keda mescos. E ta un reto muy en particular pa esnan cu ta nos profesionalnan pa considera e periodo di mas cu 2 luna cu no tabatin scol y uza e tempo aki pa bin cu ideanan con nos por bolter e mammoet tanker cu yama enseñansa.

Kico no a bay bon y cu lo mester cambia:
Sin duda e Mammoetwet cu nos a tuma over for di Hulanda y cual su idea tabata “doorstroming”, esta cu nos tur ta keda bay scol, sigui studia te na final pa haña un titulo, cu esaki no a duna e resultado desea. E realidad ta cu un porcentahe mucho halto di studiante ta ‘cay’ na caminda y practicamente no a keda nada pa nan cu bay busca trabao.

Cu e enseñansa actual ta un fracaso ta e resultado di e cantidad di studiantenan cu a fracasa ya cu mucho poco a logra caba scol. E resultado ta decepcionante y no ta mi intencion pa bisa ken ta culpabel, pero mi ta di opinion cu e sistema Hulandes cu nos a tuma over y cu tabatin poco modificacion a faya. Nos no tin ni 3% di academico, ni 10% cu a caba cu titulo di enseñansa profesional (beroepsonderwijs) y ni 25% di nos poblacion tin un MAVO diploma.

Cu e Corona Virus aki nos tur tin e oportunidad pa cambia nos sistema di enseñansa dirigi mas riba necesidad y haci’e mas pragmatico. Kico e necesidad a base di ki politica gobierno ta hiba y unda nos kier bay cu nos pais? Un tempo e refineria y turismo tabata nos pilarnan economico, pero mirando e situacion actual e ta hopi insigur y masha fragil. Nos por bay dedica mas na un ‘kenniseconomie’, unda conocemento ta un forma y un base pa por tin un futuro. E futuro pa esunnan cu ya ta aki ta depende den ki direccion nos kier hiba nos pais. Unda nos ta, unda nos kier bay y con! Kico ta e prijs cu nos kier paga?

Gobierno como trendsetter:
E realidad ta cu lo tuma nos mas tempo cu hopi mes ta realisa pa ‘jump start’ nos economia, unda nos ningun sa cu exactitud cuanto tempo e lo dura pa nos turismo lo por cuminsa recupera. E ta hopi dificil, mescos cu e refineria. E logica cu e prijs pa bari di crudo ta bisa nos directamente riba e desaroyo di e terminal. Pero si e prijs di bari no ta ariba di 50 dollar lo no ta facil pa haña un operador pa pone por ehempel un hydro cracker den e refineria.
Kico mas tin pa yuda? Gobierno como trendsetter mester sigui inverti y nos banconan, cu tin sobrelikides, cu interes hopi abao mester hinca placa den proyectonan cu por start mesora, unda gobierno tambe tin un rol den esaki.

Kico ta pasa cu nos muchanan?
Pakico un parti economico den e articulo aki? Ta pasobra enseñansa ta costa placa y pa garantisa un nivel mester hende y placa pa yuda nos. Al final gobierno mester duna guia, pone nan vision riba papel, kico ta bay pasa cu nos muchanan den tur nivel di enseñansa despues di e Corona Virus aki. Ta bay tin tempo y entusiasmo pa haal in? Kico ta pasa cu nos muchanan? Ta laga nan bay over y guia nan pa nan no pega den e otro klas y esunnan cu mester pasa examen pa caba scol, con nan ta haña al final nan diploma? Con ta bay gana e tempo perdi?
E contestanan no ta facil pa duna, pasobra ta esunnan den field, nos expertonan lo por duna un contribucion. Un cos si. Corona Virus ta dunando nos e oportunidad pa tuma curashi y cu mester cambia nos sistema di enseñansa. Cu e poco medionan financiero cu lo tin, ta obliga nos tur pa ban yuda cambia cos. E lo no ta den enseñansa so, pero tur caminda. Nos tin mucho hende cu keto bay a custuma opone tur cambio. Nos lo mester bay biba cu hopi menos y esaki ta obliga nos tur di ta creativo y innovativo. Entradanan di nos pais y di nos tur lo sinti un reduccion.

Mi intencion ta pa trece un discusion con nos tur por bati cabes hunto pa buca solucionnan factibel. Nos mester bay determina nos prioridadnan. Mester pone un direccion pa un vision unda nos kier bay, pasobra status quo no por mas. No tin medionan financiero pa sostene un situacion pa laga tur cos mescos.