Indonesia tin mas cu 4500 caso registra di e virus y alrededor di 400 morto di e virus. Expertonan ta di pensamento cu por tin hopi mas casonan no registra.
Isla Java, Indonesia – E pueblo Indones, Kepuh, a bin cu un idea cu por wordo considera hopi creativo den e temporada aki di crisis di salubridad publico. Cabesante di un organisacion di hoben a bin cu e idea y a traha en colaboracion cu polis local pa implementa esaki.
E pueblo a cuminsa haci uzo di voluntarionan bisti como spirito pa asina spanta hende den mantene distancia social. Den cultura Indones tin storianan y mitonan di spirito cu yama ‘pocong’. Ta ser bisa cu pocong ta representa almanan di esnan morto cu ta pega ainda riba mundo.
Apesar cu e noticiero di Reuters ta informa cu e tactica a causa cu mas persona ta sali pafor pa asina wak e ‘spiritonan’, esnan local pa e area kermen e situacion a mehora. Un residente a splica cu desde e presencia di pocong, mayornan y muchanan ta kedando cas.
Segun e residente ta splica cu hendenan a stop di keda riba caya anochi. Un teoria ta cu e iniciativa aki a funciona paso e ta recorda e habitantenan di e area di e posibel efectonan mortal cu e coronavirus por tin.
E cabesante di e grupo cu a organisa e iniciativa, Anjar Pancaningtyas, a splica cu “nos kier ta diferente y crea un efecto cu ta repelente, paso pocong ta duna miedo y ta eng”.
E habitantenan di e area ainda falta conocimento con pa frena e plamamento di Covid-19, esaki segun cabesante di e pueblo di Kepuh. “Nan kier biba manera normal y ta dificil pa nan sigui instruccion pa keda cas.”
Aunke esaki ta un idea no usual, e ta un medida pa haci hende mas consciente di e virus. Indonesia no ta e unico pais cu iniciativanan creativo manera esaki, na India polisnan riba brommer ta bisti helm cu tin forma di e virus.
