Home Uncategorized Gobierno Mericano kier investiga si coronavirus a origina den un laboratorio Chines,...

Gobierno Mericano kier investiga si coronavirus a origina den un laboratorio Chines, esaki apesar di falta di evidencia

SHARE

Agencia Mericano di inteligencia y di seguridad nacional ta laga sa cu Gobierno di Donald Trump kier investiga e posibilidad cu COVID-19 a origina den un laboratorio na China. E teoria ta solamente un di e multiple cu actualmente ta wordo persigi pa investigadornan.

Meta di investigacionan haci ta pa determina e origen di e virus cu ta afectando bida humano rond mundo.
Na e momento di publicacion, coronavirus tin mundialmente 2,100,667 caso registra y 136,048 morto registra.

Merca no ta kere cu e virus ta un sorto di arma biologico crea pa China. Pa esnan encargo di compila inteligencia (informacion), e ta parti normal di procedura pa investiga tur angulo y teoria. E teoria cu miembronan di inteligencia Mericano kier explora ta si e virus a origina den un laboratorio na Wuhan, China y cu accidentalmente esaki a wordo libera den publico.

Fuentenan di CNN a duna di conoce cu Merca ta purbando di investiga si ta un persona a keda infecta accidentalmente cu COVID-19 den un laboratorio, o si mal organisacion y mal maneho di material den e laboratorio a causa infeccion entre persona.

Chief of Staff, Mark Miley, a duna di conoce si cu te awor no tin ningun evidencia pa confirma e teoria. E evidencia cu tin te awor ta bisa cu e origen di e virus ta uno natural. Gobierno Chines ta desmenti e acusacion cu e virus a ser crea den un laboratorio.

En todo caso, investigadornan ta purbando di compila informacion pa asina purba pinta un imagen mas completo di con e virus a origina. Na 2018, empleadonan publico di Merca  su ‘state department’ a splica nan preocupacion caba pa e seguridad di e laboratorio di virologia di Wuhan Institute.