Hulanda – Riba e di 167 aña di Van Gogh, su pintura titula ‘Lentetuin, de pastorietuin te Nuenen in het voorjaar’ ta wordo horta for di e Singer Laren Museum. Ta ser bisa cu e trabou di arte aki traha pa e pintor Hulandes por tin un balor di entre 5 pa 6 miyon euro.
E museo Hulandes ta sera pa publico desde cu e crisis di COVID-19 a cuminsa. E ladronan a logra bay cu e pintura diadomingo marduga despues di a kibra e porta di glas cu tin dilanti na e museo. Ta ser bisa cu esaki ta e unico trabou di arte cu a wordo horta.
E alarma di seguridad a cende, pero e malechornan a logra bandona e sitio prome cu polis a yega. E director di e museo, Jan Rudolph de Lorm, a bisa cu e ta sumamente rabia pa cu e perdida di e pintura. Sinembargo, e pintura tawata fia tambe for di Groninger Museum.
Segun de Lorm, esaki ta un caso lamentabel cu ningun museo, especial uno cu a fia un articulo di arte historico, kier haya nan aden. E manager general di Singer Laren Museum, Evert van Os, a segura cu tur medida di seguridad tawata segun protocol.
Vocero di polis di e region a informa cu nan expertonan di locual ta robo di arte ta yudando cu e investigacion. Tambe Interpol a pone e pintura riba nan lista di trabounan di arte cu ta horta.
