Dos crucero, Zaandam y Rotterdam, ta pega riba lama cu varios pasahero abordo cu sintoma di COVID-19. Nan no ta hayando cooperacion for di paisnan pa desembarca. Presidente di e linea di crucero Holland America Line, Orlando Ashford, a publica un comunicado expresando su desapunto y frustacion cu e situacion.
Segun Ashford, paisan a bira lomba pa nan. Nan no ta coopera pa laga e cruceronan desembarca na nan waf. Paisnan di Latino America a nenga tambe di coopera pa laga e pasaheronan den estado critico baha pa ricibi ayudo medico. Operador di un di e crucero ta bisa cu bidanan ta na peliger mientras paisnan ta ignora nan suplica. 4 pasahero a fayece caba abordo a consequencia di COVID-19.
Operador di e crucero ta bisa mas persona lo bay muri si nan no laga nan desembarca. Miles di persona ta pega riba lama e momento aki pa motibo di e pandemia. Presidente di e linea di crucero ta pidiendo paisnan di por fabor mustra nan compasion.
E plan ta pa pasaheronan baha y asina busca un manera pa yega bek na nan pais. Ta papiando di 4 pasahero cu a fayece, 8 trahador cu a test positivo pa e virus y como 200 persona cu ta mustra sintoma di ‘griep’. E pasaheronan ta di varios nacionalidad y hopi di nan ta di edad mas avansa.
Diamars atardi e crucero lo mester yega Florida y ta spera cu e estado Mericano acepta nan plan pa desembarca y laga pasaheronan tuma vuelo pa bay bek nan pais. Gobernador di e estado a laga sa cu nan tampoco no kier bay keda cu problema di e crucero. Su estado no kier bay haye ta brinda cuido medico o otro asistencia na ‘stranhero’.
Nan ta sperando di haya cooperacion di waf di Fort Lauderdale. E dos cruceronan ta conta cu 304 persona di Merca, 228 persona di Reino Uni y tambe 116 persona di Australia.