Rooi Santo – Dialuna durante dia tabata core mensahenan riba medionan social cu na Ting Wei Supermarket un persona contagia cu e Coronavirus (COVID-19) lo tawata frequenta e tienda. Ta trata akinan di un turista cu a sali positivo pa e virus.
E propietario di e negoshi a asumi su responsabilidad di proteha su empleadonan y clientenan di e virus. Pa 10 dia e supermercado lo keda sera y lo bay haya un limpiesa extenso. E tienda aki lo habri bek pa su clientenan dia 1 di april 2020.
Mester nota cu den e temporada aki hopi persona ta alerto pa e desaroyonan relaciona cu e COVID-19. Riba rednan social mensahe ta bay rond informando o purbando di adverti nos comunidad di cierto lugar ‘contamina’ cu e virus.
Hasta ta bay asina leu na publica potret di persona hunto cu tur nan datos bisando cu nan ta contagia cu COVID-19. Mirando cu e fuentenan aki no ta oficial, ta consehabel pa no comparti informacion tanten cu no tin confirmacion oficial.
