Tanki Leendert/ Moko: Diadomingo pa mas o menos 3’or y 35 di marduga, na momento cu un patruya di polis tabata pasando riba e caminda di Solito pa Tanki Leendert na altura di Cas Casuela nan a bin nota un brommer y e motociclista no tabata tin helm bisti.
Polis mesora kier a bay atende cu e motociclista, pero esaki na momento cu ela mira e intencion di polis ela hisa velocidad y a bay direccion nort. Polis no a bay core su tras pero Si a sigui bay direccion panort pa si acaso nan acerca e brommer nan por atende cu e motociclista, pero ora nan a yega na e rotonde di Tanki Leendert, nan no a mira e brommer mas.
Ariba e rotonde e polisnan a bin topa cu e brommer, e brommer tabata parti den dos, e motociclista lo a dal cu su brommer riba e rotonde y den e impacto fuerte esaki lo a parti den dos. E motociclista mes no tabata na e sitio mas.
E polisnan na e sitio mesora a pidi cooperacion di nan coleganan pa asina cera e rotonde pa evita cu e trafico pega y tambe a pidi pa presencia di polis di trafico pa haci un investigacion.
Basta rato despues polisnan a haya un melding cu na un cas na Moko, lo a yega un persona cu ta herida y tabata kehando di dolor, e persona lo a pidi pa yama un ambulance p’e.
Na e momento ey polisnan no tabata sigur si ta trata di e motociclista of un otro accidente, pa motibo cu mesora tras di e melding aki a drenta un melding cu un auto lo a cay den Rooi na Saliña, cerca di e dam, polisnan a bay direccion di Saliña pero no a topa cu niun auto den niun Rooi.
Ambulance bay na e cas unda e persona herida tabata ta y na momento cu nan tabata atendiendo e persona aki, nan a bin compronde cu tabata trata di e motociclista cu a accidenta un rato prome riba e rotonde Tanki Leendert.
Mesora polis di trafico a bay na e adres pa asina tuma declaracion y datos di e motociclista. E motociclista enberdad tabata herida y tabata kehando cu su brasa tabata haci hopi dolor.
Despues cu personal di ambulance a trat’e, nan a dicidi di transport’e pa hospital pa un tratamento medico mas avansa.
Un rato despues famia di e motociclista a bin busca e brommer cu a keda parti den dos riba e rotonde Tanki Leendert.
