Dellanire Maduro, lider di Fraccion di POR, a informa cu siman pasa a ricibi e contesta riba e preguntanan haci na Minister Dangui Oduber tocante maneho di Coronavirus na Aruba.
Por mira cu cada departamento y instancia cu ta relaciona cu e protocolnan pa sigui den caso di emergencia, ta haciendo nan best pa duna e informacion necesario y al caso pa prevencion y proteccion. Tambe por mira cu ta afina nan protocol segun ta haya mas informacion riba con otro paisnan ta adaptando di nan, mirando cu e virus aki ta nobo y ta haci cu segun e ta cana ta adapta e forma di protocolnan.
Dellanire Maduro a indica cu mirando cu e preguntanan a wordo haci dia 31 di januari, cual ta mas cu un luna pasa, y e desaroyo di e virus a crece exponencialmente, e tin pregunta adicional, mientras cu lo desea di ricibi mas splicacion riba algun di e preguntanan contesta, e ta sigui haci e peticion pa por haya un fecha y orario pa e mandatario por bay Parlamento pa por haya mas claridad. Di e forma aki tambe por wak con for di Parlamento por sostene y yuda e instancianan riba e topico di Coronavirus.