Playa Pabao – Enconexion cu dia Internacional di Hende Muhe directiva di Centro di Bario Playa Pabao ta organisa, diabierna 6 di maart, un actividad na unda e bario di di Playa Pabao y Aruba ta keda cordialmente invita. E celebracion ta tuma luga na Centro di Bario Playa Pabao y ta cuminsa pa 7’or pm y ta termina pa 9‘or pm. Orador invita na e actividad aki ta sra Suzy Maduro.
Kende Suzy Maduro ta?
Suzy Maduro ta un persona cu ta basta conoci den nos comunidad.
Su carera: Suzy a studia na Merca y tin e titulo di “Bachelor of Science in Journalism” for di Bowling Green State University na estado di Ohio, Merca.
Suzy tin un trayectoria largo den su carera profesional na Aruba cual a cuminsa como relacionista publico den sector hotelero. Despues di esaki ela bay traha na SETAR como relacionista publico (e tempo ey SETAR no ta un nv ainda). Durante su carera ela haya oportunidad di traha entre 1991 pa 1995 den Public Relations na Cabinet di Minister Plenipotenciaro di Aruba na Den Haag, Hulanda. Na su regreso na Aruba ela bay bek na SETAR na unda ela traha como PR officer y a pasa den tur e cambionan di e compania y tur e desaroyo cual a conduci na final cu ela bira un nv. Aki Suzy a traha te cu 2019 como Corporate Communication Manager y ta hopi conoci pa e funcion aki. Awendia Suzy tin su propio Consultancy, Suzy Maduro Consultancy cu ta duna conseho profesional riba tereno di comunicacion y relacion publico. Alabez Suzy ta un orador dinamico cu ta duna charlanan di motivacion, comunicacion, public relations y varios topico interesante. E ta un hende muhe cu a destaca den tanto su trabou profesional como su trabou den comunidad di Aruba. Semper ela sostene Centro di Bario Playa Pabao y otro instacianan caricativo of social. E tabata presidente di Quota Internacional of Aruba na 2 ocasion, miembro ehecutivo di YMCA y Stichting Schouwburg Aruba pa varios aña pa menciona un par. Diabierna dia 6 di maart, Suzy ta bay duna un presentacion encuanto di Dia Internacional di Hende Muhe Muhe 2020 cu e tema “nos ta e generacion di igualdad” haciendo e derechonan di hende muhe un realidad. E actividad aki lo tuma luga na Centro di Bario Playa Pabao. Tambe tin riba e programa un testimonio di sra Zarina Todd cu a baha 100 kilo. Declamacion di poesia dor sra Ruthy Vrieswijk y Omaira Britten y pa pone e cherry riba e bolo presentacion di dos cantante masculino Rocco Franken y Ron Martis.