Parlamentario Endy Croes ta ricibiendo reaccion for di tur skina na Aruba alrespecto e caso grandi di corupcion y fraude cu terenonan di pais Aruba orkestra cu e acusado principal ex minister di AVP Benny Sevinger, amigo di Mike Eman. Den ultimo dianan Parlamentario Croes a acudi na diferente actividad di carnaval pa duna sosten na nos cultura. Remarcabel tabata cu pueblo ta hopi pendiente pa cu e casonan cu – di acuerdo cu e timing di pueblo -Ministerio Publico ta tardando demasiado cu nan.
Tanto e caso IBIS unda Paul Croes ex minister di AVP a arasa cu ontheffing a cambio di placa como e caso mas grandi di AVESTRUZ cu e autor principal Benny Sevinger. Ministerio Publico a drenta cas di Benny na october 2019 despues di ta investigando pa algo mas cu un aña.
N.V.-nan fantasma
Parlamentario Endy Croes ta calma e pueblo na tur momento splicando nan cu e caso di ex minister di AVP Benny Sevinger ta uno hopi grandi y berdad ta tuma tempo pa por rond af un investigacion di e magnitud aki. Pues pidiendo pueblo pasenshi y duna Ministerio Publico e espacio cu nan mester pero alabes ta garantisando pueblo cu tin demasiado prueba y evidencianan esencial y cu no tin espacio pa Benny just walk away sin mester deal cu husticia. Benny tabata entre otro firma akkoord pa duna N.V’s di amigonan di AVP opties riba terenonan comercial y a resulta cu e N.V.-nan ey nunca tabata existi. Benny a duna cooperacion y aprobacion pa sharenan wordo bendi unda opties ta bay cune pa miyones. Asina tin caso conoci y tin prueba cu tereno a wordo bendi pa 3.5 miyon dollars.
Bendemento di patrimonio di pueblo
Ta tristo pa mira con un minister atrobe di AVP kier corumpi henter un sistema door di facilita amigonan cu terenonan na prime locations y “willens en wetens” a coopera pa nan bende patrimonio di pueblo pa sumanan miyonario. Mesun minister aki Benny Sevinger a duna Roberto Rincon un tereno na Balashi den 24 ora. Nos por corda con Benny a bisa den prensa cu el a “google” Roberto Rincon su nomber y no a haya nada contra dje. Awe Roberto tambe ta cera. Ta cu e hendenan aki AVP tabata deal. Boso ta corda Kiko Gomez kende awe tambe ta cera? Pueblo ta bastante impaciente pero como Parlamentario responsabel nos ta trankilisa nan na cada momento. Lo no ta un mal idea pa Ministerio Publico splica pueblo con leu nan ta cu e caso IBIS di Paul Croes y e caso monstruoso esta e caso AVESTRUZ di Benny Sevinger. Nos no por lubida cu Benny a grita den Parlamento ‘I don’t give a damn!’ Kisas e por grita mescos dilanti hues? Time will tell!!